Portada Sociedá El concursu d’idees pa los tarrenes d’El Cristu-Buenavista va convocase n’abril

El concursu d’idees pa los tarrenes d’El Cristu-Buenavista va convocase n’abril

by redacción asturnews

La Conseyería d’Infraestructures, Ordenación del Territoriu y Mediu Ambiente va convocar n’abril el concursu internacional d’idees pa ordenar los tarrenes d’El Cristu-Buenavista, dempués de que la comisión de siguimientu del alcuerdu validara esta selmana la primer fase del protocolu suscritu ente’l Principáu y el Conceyu d’Uviéu y tomáu en considerancia les bases que van haber de rexir la convocatoria.

El concursu, nel que va poder inscribise la xente los quince díes posteriores a la so publicación nel BOPA, busca escoyer de la meyor propuesta urbanística pa la ordenación del ámbitu urbano y espacial del antiguu Hospital Universitariu Central d’Asturies, n’Uviéu, estableciendo un amenorgáu númberu de condicionantes y llimitaciones nes bases y pliegos pa dar a los participantes la mayor llibertá propositiva posible. Too ello al envís de facilitar la llibre espresión y concurrencia de distintos planteamientos arquitectónicos y urbanísticos orixinales,y soluciones programátiques y constructives acordies con esti tipu d’intervenciones; y siempres nel marcu de la mayor eficiencia nel usu realista de los recursos.

El concursu afita un primer premiu dotáu con 25.000 euros, un segundu premiu dotáu con 9.000 euros y un tercer premiu dotáu 3.000 euros. El primer premiu va llevar apareyáu l’encargu de los documentos urbanísticu y ambiental necesarios (documentu de revisión parcial del Plan Xeneral d’Ordenación d’Uviéu y la redacción del plan especial que desenvuelva dicha revisión).

Va poer presentase al concursu, como director, toa persona con titulación d’arquiteutura o inxeniería de caminos, canales y puertos, que s’atope habilitao llegalmente pa exercer l’oficiu nel territoriu español. Tantu nel formatu de persona física como xurídica va riquise un equipu multidisciplinar mínimu formáu por, siquier, una persona titulada n’arquitectura, una n’inxeniería de caminos,  canales y puertos, una en derechu, una en ciencies económiques y una en xeografía. Una vegada publicada la llista d’almitíos, los concursantes van tener tres meses pa ellaboración de les propuestes. El fallu del concursu va ser por xuráu con representación de l’Alministración del Estáu, del Principáu, del Conceyu d’Uviéu, de les asociaciones vecinales, de los Colexos Oficiales d’Arquiteutos d’Asturies y del d’Inxenieros de Caminos, Canales y Puertos, y por un arquiteutu de reconocíu prestíu y esperiencia acreditada na materia oxeto del concursu.

Tamién te podria gustar