El conciertu “Bestiariu” inaugura la nueva temporada de La Reciella de la Factoría

Esti vienres, 1 de febreru, a les 19 hores, nel Espaciu Escénicu de la Factoría Cultural. Alicia Álvarez y David Varela interpreten dalgunes de les canciones más representatives de los populares discos de música infantil en llingua asturiana “Bestiariu”.

La sesta edición de La Reciella de la Factoría entama esti vienres con un conciertu bien especial, “Bestiariu” (esbilla acústica). Alicia Álvarez y David Varela van interpretar dalgunos de los temes más representativos de la nomada riestra discos de música en llingua asturiana pa neñes y neños, con animales diferentes como protagonistes. Sedrá esti vienres día 1 de febreru, a les 19 hores, nel Espaciu Escénicu de la Factoría Cultural, na avenida de Portugal, 13, con entrada llibre y de baldre hasta completar aforu.

“Bestiariu” ñació nel añu 2015 con un oxetivu, averar la llingua asturiana a neñes y neños d’una forma prestosa, con cantares creaos por grupos mui conocíos y solistes asturianos, nes que los animales son protagonistes. Impulsáu pola mesma Alicia Álvarez, cantante y guitarrista del grupu “Pauline en la Playa”, per aciu del proyeutu cultural La Fabriquina, son tres los discos que sacaron d’esi trabayu en comuña. Dende mures patinadores hasta perres siderales, de catasoles a esperteyos, o llobos que son los bonos del cuentu, bandes y solistes como’l mesmu David Varela, Nacho Vegas, Nosotrash, Dixebra, Felpeyu, La Tarrancha o Muga ponen música a ritmu de rock, pop, ska o folk al animalariu n’asturianu. Esta propuesta ye de muncha calidá creativa y sonora.

Dalgunos de los temes más representativos d’estos discos, y en versión acústica, van interpretase esti vienres a les 19 hores en La Factoría Cultural por Alicia Álvarez y David Varela, músicu de bandes como La Bonturné o El Koku La Manzana. Un conciertu pa neñes y neños de 3 a 10 años (que siempre tienen de dir en compañía d’una persona adulta) pa pasalo bien en familia.

Ye la primera de les cuatro sesiones del primer ciclu de 2019 de La Reciella de la Factoría, de febreru a mayu, entamada pola conceyalía de Cultura d’Avilés per aciu de la Estaya de la Llingua y la Factoría Cultural pa poder normalizar l’usu y conocencia de la llingua asturiana ente la reciella. Actividaes siempre con entrada llibre y de baldre hasta completar aforu. Dempués van venir los cuentos d’Ana Morán, con “Nun quiero ser princesa”, el 15 de marzu. El  5 d’abril, música, narración y marionetes con “El viaxe d’Irina”, d’Olga Cuervo y David Varela. Y el 24 de mayu, teatru con “Hansel y Gretel”, d’Higiénico Papel Teatro, premiu Nel Amaro de Teatru Profesional en Llingua Asturiana 2018.