El Conceyu y Ópera d’Uviéu averen ‘La Bohème’ a los barrios

El Conceyu y Ópera d’Uviéu averen ‘La Bohème’ a los barrios
06 febreru 14:52 2016 Imprimir

El presidente de la Fundación Municipal de Cultura d’Uviéu, Roberto Sánchez Ramos, presentó esta selmana la iniciativa ‘La Bohème nel to barriu’, cola que quier averase la ópera a los barrios uvieínos esti sábadu 6 de febreru. L’actividá faise en collaboración d’Ópera d’Uviéu, esti sábadu 6, a partir de les 20:00 hores, va retresmitise en directu la función a dellos espacios públicos del conceyu. Asina, ente 1.300 y 1.500 persones van poder esfrutar d’esta ópera de Puccini en distintos puntos del conceyu.

El Teatru Casín de Trubia, el Teatru de Pumarín, el centru social del Naranco y los institutos de La Ería y La Corredoria van proxectar en pantalla xigante y en directu, la representación que va tener llugar nel Teatru Campoamor. La entrada va ser llibre y dende el Conceyu conviden a tolos ciudadanos y ciudadanes a afayar una de les producciones propies de mayor ésitu d’Ópera d’Uviéu. Amás, Marzio Conti, responsable de la dirección musical d’esta obra, va ufiertar una conferencia a les 18:45 hores nel IES de La Ería.

El presidente de la Fundación Municipal de Cultura esplicó qu’esta actividá foi aprobada por unanimidá pol Conseyu rector y supon un costu pa les arques públiques de 14.000 euros. Coles mesmes, aseguró qu’esiste la voluntá política de repitir esti tipu d’esperiencies con otres representaciones artístiques nel futuru ente les que citó la danza, el teatru o a la zarzuela.

  Categories: