El Conceyu Xeneral d’Andecha Astur escueye cares nueves na dirección del partíu

El pasáu sábadu 5 d’abril la organización política Andecha Astur celebró’l so Conceyu Xeneral Estraordinariu nel que salío escoyía una nueva Xunta Executiva, amás de reformase los estatutos de la organización. Ente los miembros de la nueva executiva delles cares nueves provenientes de les bases de mocedá del partíu.

La nueva executiva d’Andecha Astur ta compuesta por 8 cargos, hai que destacar especialmente la renovación que supón el relevu nos dos cargos más importantes d’Andecha Astur: Daniel Cueli Canto sustitúi, asina, a Arturu Xosé Bermeyu, que dende’l aniciu fuere Secretariu Xeneral d’Andecha Astur, y Mariu Arbesú releva al tamién hestóricu Marcos Abel Fernandez al frente de la Secretaría d’Organización.

Los otros miembros de la executiva serien: Carme Pérez Antolín (Ayalguería), Pablo Rios (Estaya de Rellaciones Esteriores), Paloma García (Estaya de Mediuambiente), Paulo Arboleya Canteli (Estaya de Propaganda), Antón Martinez (Estaya de Comunicación) y Marcos Abel Fernández (Política de Conceyos).

Na so intervención, tres salir escoyíu Secretariu Xeneral, el maliayu Daniel Cueli dedicó les sos primeres pallabres a reconocer “la trayectoria de llucha y coherencia de Arturu Xosé Bermeyu nestos 18 años como Secretariu Xeneral d’Andecha Astur”. Tamién quixo destacar la xuventú de la nueva executiva y “l’ánimu y les ganes coles que los nueos miembros garren esta responsabilidá”.