El Conceyu Universitariu pol Asturianu ve un nuevu pasu hestóricu na decisión de Maxisteriu

El Conceyu Universitariu pol Asturianu (CUPA), organización que cunta con representación nel Claustru de la Universidá d’Uviéu, espresó esta tarde al traviés d’un comunicáu la so felicitación a la Xunta d’Escuela de Maxisteriu de la Universidá d’Uviéu “pola aprobación de la propuesta de crear una ‘Mención’ d’asturianu como solución atopada pa que la llingua tea nes enseñances reglaes”.

Con esta decisión, comenten dende’l CUPA “L’asturianu va tar per primer vegada como materia dafechu oficial en Maxisteriu”, lo que pal colectivu ye “un pasu hestóricu pal asturianu, qu’entra, como yá lo fizo en Filoloxía, per primer vegada dientro de les enseñances reglaes y oficiales universitaries”.

Por ello, feliciten a los miembros d’esta Xunta “pola so responsabilidá y consensu a la hora del votu”, añandiendo que ven nestes dos decisiones, en referencia a Maxisteriu y Filología “un cambiu perimportante na forma d’entender la Universidá d’Uviéu, que ta d’esta forma al serviciu de los asturianos y los sos intereses y non a la contra, como pasaba n’etapes anteriores”.