Portada Educación El Conceyu Universitariu pol Asturianu aumenta la so representación nel Claustru de la Universidá

El Conceyu Universitariu pol Asturianu aumenta la so representación nel Claustru de la Universidá

by asturnet

El Conceyu Universitariu pol Asturianu ta acabante anunciar la suma d’un miembru más de les sos candidatures al Claustru de la Universidá d’Uviéu, el máximu órganu de representación de la Institución.

Según esplicó’l CUPA nun comunicáu, “la fin de los estudios d’otru candidatu del Campus de Xixón fizo que-y llegare’l turnu a un representante del CUPA”. Una madre na representación que pa los activistes universitarios supón que’l Conceyu Universitariu pol Asturianu pueda “llevar les reinvidicaciones asturianistes al Claustru y trabayar dende ellí con más fuercia pa que la llingua asturiana dea pasos na Universidá d’Uviéu y los asturfalantes vean reconocíos los sos drechos na institución educativa asturiana”.

El CUPA anunció amás “sigue amás coles sos actividaes dientro de la Universidá”, añadiendo “que pronto va dar importantes pasos na normalización y promoción del asturianu, como yá vieno ocurriendo dende’l pactu ente esta organización y l’equipu del Rector Gotor”. Ente les acciones destacaes pol CUPA tán la entrada del asturianu nos estudios oficiales de Maxisteriu y Filoloxía, los primeros discursos n’asturianu d’un Rector en 400 años d’Universidá d’Uviéu, y la puesta en marcha d’otres iniciatives, como la torna de la páxina web (anguaño en marcha), la edición de material corporativu n’asturianu, la rotulación billingüe de delles actividaes, etc.

Tamién te podria gustar