El Conceyu Universitariu pol Asturianu apoya la petición d’una mención cualificadora d’asturianu en Maxisteriu

El Conceyu Universitariu pol Asturianu (CUPA), organización independiente asturianista y universitaria na que participen alumnos, personal d’alministración y servicios y que cunta con representación nel Claustru de la Universidá d’Uviéu, quier volver a mostrar el so apoyu a la creación de “los títulos y especialidaes d’asturianu necesaries en Maxisteriu”, como yá lo espresare la organización nel puntu 4.4 del Programa Electoral al Claustru de la Universidá d’Uviéu, en mayu de 2008 .

Dempués de l’aprobación del Minor d’asturianu en filoloxía, un pasu hestóricu pal asturianu (per primer vegada dientro de les enseñances reglaes universitaries), ye’l momentu de siguir dando pasos na normalización del asturianu y la creación d’esti pernecesariu títulu en Maxisteriu, ye una de les prioridaes nesti campu.

Tamos seguros de que la propuesta treslladada a la Directora de la Escuela de Maxisteriu va salir alantre, y que los criterios científicos van trunfar como ocurrió en Filoloxía, penrriba de complexos culturales y posicionamientos partidarios.

Confiamos amás, en que la propuesta de solución pal asturianun en Maxisteriu va volver a tener l’apoyu del Rector, Vicente Gotor, que dende l’entamu del so mandatu vien amosando’l so apoyu a los estudios de llingua asturiana y a la normalización del asturianu na Universidá.