El Conceyu Universitariu pol Asturianu “inquietu” poles declaraciones del Decanu de Xeografía y Hestoria en defensa de De Castro

El Conceyu Universitariu pol Asturianu (CUPA) mandó güei un comunicáu nel que manifiesten la so “inquietú” énte’l reciente comunicáu del Decanu de la Facultá de Xeografía y Hestoria, nel que se solidariza col profesor Félix Fernández de Castro por mor de l’apaición de dalgunes pintaes nel Campus del Milan onde se señala a esti profesor como “antiasturianu” a causa de la propuesta, que’l CUPA considera “acientífica, demagóxica y políticamente xacobina” y que de Castro presentó na última Xunta de la Facultá de Filoloxía.

Esti comunicáu del Decanatu inquieta al CUPA “pues a finales del mes de mayu na Facultá de Xeografía y Hestoria apaecieron cartelos onde amás de facer burlla de la llingua asturiana se difamaba d’un mou xabaz a dos estudiantes d’esa Facultá que se presentaren como candidatos a representantes estudiantiles nel Claustru”, y según el CUPA, “entós el Decanatu non solo nun fizo nengún tipu de comunicáu públicu sinón qu’amás los cartelos se caltuvieron per dellos díes”.

El CUPA pide “un poco de coherencia a un Decanatu que se solidariza con un profesor d’otra Facultá pero qu’inora a los estudiantes de la so propia Facultá”.