El Conceyu presenta la campaña ‘Por un Uviéu llibre de Covid’

26 ochobre 08:05 2020 Imprimir

El conceyal de Participación, Mario Arias presentó esta selmana pasada , en rueda de prensa, la campaña d’espardimientu y promoción de l’aplicación Radar COVID, que lleva por eslogan ‘Por un Uviéu llibre de Covid’, “que ye lo que pretenden, qu’esti virus pase a la hestoria.

Arias recordó y estimó que “too tien el so orixe nel equipu de Formación del Conceyu d’Uviéu y tamién nes árees d’Accesibilidá y Mocedá. Ye una acción solidaria con nós mesmos y col restu de ciudadanos”. A xuiciu del responsable municipal de Participación, “l’oxetivu nun ye otru que faer tolo que tea nes nueses manos para atacar con tolos medios que tengamos al nuesu algame la situación y frenar la espansión del virus. Dalguna de les acciones que yá punximos en marcha son les conferencies al traviés de la nuesa web para dar espardimientu d’esta aplicación, vídeos para saber cómo se descarguen…y al traviés de les nueses redes sociales vamos siguir informando. Tamién los correos electrónicos de tolos emplegaos municipales van llevar siempres na parte inferior esta promoción, va haber cartelería en dependencies municipales y nel tresporte públicu para dar espardimientu y convidar a los ciudadanos a que se descarguen l’aplicación”.

Amás, dende la área d’Accesibilidá, “vamos dirixinos a colectivos rellacionaos cola discapacidá y a los mozos, para intentar concenciar y por que los que meyor remanen les nueves tecnoloxíes descárguense l’aplicación”- Mario Arias remató con un llamamientu a tolos vecinos d’Uviéu, “que’l so comportamientu foi exemplar. Apelo a la so responsabilidá, por que cumplamos colos encamientos para torar la curva d’andaes y al propiu virus. Convídovos a descargar esta aplicación”.  “De cara a la fin de selmana y al derbi clásicu Madrid-Barcelona”, Arias destacó “la importancia de guardar la distancia social, l’usu del mázcaru, hixene de manos y a la qu’agora sumemos la descarga d’esta aplicación”.