El Conceyu pola Oficialidá nota un cambiu d’actitú positivu nel PSOE y el PP tres reunise colos sos grupos parlamentarios

16 marzu 00:18 2005 Imprimir

La principal conclusión que’l Conceyu Abiertu pola Oficialidá saca del alcuentru teníu ayer con representantes de los grupos parlamentarios del PSOE y el PP ye qu’anguaño en nengún de los dos partios paez esistir “una posición cerrada” tocante a la reconocencia oficial del asturianu y que nun descarten asumir esta demanda social nun futuru, inda nun consideren que’l momentu pa facelo seya’l de la prósima reforma estatutaria. Nel alcuentru del Conceyu Abiertu col otru grupu presente na Xunta Xeneral, Izquierda Xunida-Bloque, la plataforma ciudadana interesóse pola postura que va defender na discusión de la reforma la coalición y si va ser la mesma que caltién como organización integrada nel propiu CAO.

En declaraciones a Asturnews, Fernando Ornosa, ún de los participantes nel alcuentru colos grupos parlamentarios, reconoció haber “percibio per primer vez que’l PSOE nun mantién una posición cerrada respective a la oficialida nin se niega a falar d’ella”, una actitú positiva que se detectó tamién nel alcuentru col Partíu Popular qu’a xuiciu del representante del CAO: “nun momentu dau podía tomar una decisión” favorable a la oficialidá inda “güei estean duldosos”. Nel cursu d’estos alcuentros, tanto’l representante del grupu socialista, el diputáu José Luis Montes, como’l parlamentariu popular Joaquin Aréstegui, amosaron una “actitú receptiva” énte les esmoliciones manifestaes pol Conceyu. Montes admitió qu’ente los miembros del CAO el que cada vez hai más militantes socialistes partidarios de reconocer los derechos llingüísticos asturianos y nun refugo la posibilidá de que nun futuru a mediu plazu el so partíu asuma la oficialidá, inda aclaró que pa ello había aprebase primero como alcuerdu nun congresu de la FSA.

Como resultáu d’estos alcuentros colos grupos parlamentarios el Conceyu Abiertu pola Oficialidá tien llograo’l compromisu de los representantes del PSOE y del PP de facilitar entrambes entrevistes coles direcciones d’esos partíos n’Asturies pa que la plataforma unitaria espunxera a los másimos responsables políticos de los partíos mayoritarios la necesidá de solventar el problema llingüísticu con un alcuerdu de mínimos ente fuerces polítiques y sociales alrodiu de la reconocencia oficial del asturianu. Tanto el PSOE como’l Partíu Popular accedieron a que se produzan estes reuniones cola dirección n’Asturies de los sos partíos.

L’alcuentru col grupu d’Izquierda Xunida-Bloque, los miembros de la delegación del CAO, llograron tamién el compromisu de la diputada Noemí Martín de concertar una reunión ente’l Conceyu Abiertu y la dirección d’Izquierda Xunida d’Asturies na que la coalición que dirixe Jesús Iglesias aclarase cuála va ser la so postura estratéxica na discusión de la reforma l’Estatutu.

Según manifestó el representante del CAO, Fernando Ornosa, bona parte de l’argumentación cola que treslladaron a los grupos de la Xunta Xeneral les demandes de la plataforma cívica basóse na situación “única na que va quedar la llingua asturiana cuando s’apreben les reformes estatutaries pendientes y cuando, Aragón, por exemplu, la otra comunidá que nun tenía reconocida la oficialidá de les llingües que se falen nella, l’aprebe col consensu de tolos partíos políticos d’esa comunidá”. Esta situación, pa Ornosa, non namás va dexar Asturies como una escepción nel mapa autonómicu del estáu “sinón que va suponer importantes perxuicios de toa clase, mesmamente económicos” pal nuestru país,si tenemos en cuenta que munchos posibles recursos que se podíen consiguir dependen de la reconocencia oficial del asturianu” afirma’l miembru del CAO, que treslladó esti esmolecimientu a los parlamentarios de los tres grupos de la Xunta Xeneral.

Amás d’estos contactos y de la vía abierta de diálogu colos partíos con representación nel parlamentu autonómicu, el Conceyu Abiertu pola Oficialidá nun descarta nueves movilizaciones como la vivida el 11 de marzu n’Uviéu. Pal CAO “la ocasión pa la oficialidá ye agora, na prósima reforma del estatutu, más alantre diba ser difícil algamalo y nós vamos encarrilar el nuestru llabor a que se llegue a consiguir”.

  Categories:
Loading Facebook Comments ...