Portada Uncategorized El Conceyu otorga la Medaya d’oru a la Fundación Ópera d’Uviéu

El Conceyu otorga la Medaya d’oru a la Fundación Ópera d’Uviéu

by asturnet

El Conceyu otorga la Medaya d’Uviéu, na so categoría d’oru, a la Fundación Ópera d’Uviéu. La concesión d’esta distinción foi aprobada por unanimidá na Comisión d’Honores y Distinciones, que se celebró esta selmana.

La Comisión d’Honores y Distinciones del Conceyu d’Uviéu celebrada esta mañana, aprobó por unanimidá, conceder la Medaya de la Ciudá, na so categoría d’Oru, a la Fundación Ópera d’Uviéu. La ciudá reconoz con esta concesión, los numberosos méritos que la institución cultural atesoró desque, en 1896, empecipiárase’l  ciclu llíricu del Campoamor colos estrenos de Pagliacci de Ruggero Leoncavallo y Cavalleria rusticana de Pietro Mascagni. De magar, la temporada operística uvieina asitióse al más altu nivel, compitiendo con otres grandes temporaes non solo a nivel nacional, sinón tamién internacional. Bastante ye que, Uviéu foi protagonista de grandes acontecimientos operísticos, como la Tetraloxía wagneriana, un retu al algame de bien pocos teatros, o l’estrenu absolutu, en 2018, de la ópera contemporanea Fuenteovejuna, encargada pola Fundación al compositor asturianu afincáu n’Estaos Xuníos, Jorge Muñiz.

Quepe destacar que la temporada operística uvieina tuvo continuidá gracies a la creación, en 1977, de l’Asociación Asturiana Amigos de la Ópera, y de la constitución, en 1995, de la Fundación Ópera d’Uviéu, que contribuyó de manera decidida a ampliar la ufierta cultural para’l públicu.

Amás, ente los méritos destacaos recuéyese que la Ópera d’Uviéu foi un claru exemplu de cómo xestionar una situación tremendamente complexa de forma eficaz y segura mientres la pandemia de la Covid-19 pa la so afición y equipu profesional, afaciéndose a la permanente oscilación de los aforos, aumentando’l númberu de funciones y readaptando la disposición del públicu nel teatru, y a los aplazamientos que marcó la normativa sanitaria del momentu, llegando inclusive a simultanear les funciones de dos de los títulos de la temporada 2019/2020 nes tables del Campoamor, Madama Butterfly y Fidelio. Once funciones en dolce díes y un nuevu finxu pa la ciudá, pos la d’Uviéu foi la única temporada operística del mundu que completó tola so programación mientres esi complicáu ciclu. Un exemplu de resiliencia, nel que xugó un papel primordial la orquesta Uviéu Filarmonía, dignu d’aponderamientu, reconocencia, y valoración.

Tamién te podria gustar