El Conceyu d’Uviéu reconoz el llabor de la Fundación Galbán col IV Premiu de Voluntariáu Social

El Conceyu d’Uviéu reconoz el llabor de la Fundación Galbán col IV Premiu de Voluntariáu Social
12 avientu 13:16 2018 Imprimir

El Conceyu d’Uviéu vieno acabante reconocer el llabor de la Fundación Galbán col IV Premiu de Voluntariáu Social. El xuráu otorga por unanimidá’l galardón a l’asociación pol trabayu de los voluntarios colos neños y neñes hospitalizaos n’oncoloxía pediátrica nel HUCA.

La cuarta edición del Premiu al Proyectu de Voluntariáu Social, que cada añu convoca la Conceyalía d’Atención a les Persones ya Igualdá, estremó por unanimidá’l trabayu de l’Asociación Galbán de families de neños con cáncer del Principáu d’Asturies. La entidá alzóse col galardón pol llabor de los voluntarios de l’agrupación nos talleres y actividaes que realicen nel Hospital Universitariu Central d’Asturies (HUCA) con 37 neños y neñes hospitalizaos n’oncoloxía pediátrica, llugar onde se centralicen tolos casos de cáncer infantil del Principáu. La entrega de la edición 2018 va tener llugar el xueves 20 d’avientu a les 18.30 hores nel Palaciu d’Esposiciones y Congreso Ciudad d’Uviéu.

El xuráu presidíu pola conceyala d’Atención a les Persones, Marisa Ponga, y compuestu amás pola coordinadora de see autonómica de Médicos del Mundu Asturies (entidá ganadora en 2017) Lola Menéndez Oliva, y la xefa de sección de Servicios Sociales, Migración ya Igualdá, Cristina Calviño- reconoz d’esta manera’l trabayu que los voluntarios de Galbán desenvuelven colos pequeños y pequenes, a los que visiten trés díes per selmana y sábados alternos. Na planta d’oncoloxía pediátrica disponen d’un espaciu compartíu con diverses entidaes de voluntariáu que-yos dexa desenvolver actividaes consistentes na realización de talleres de xuegu, manualidades, etc. colos neños, neñes y adolescentes hospitalizaos.

El proyectu de voluntariáu de Galbán creose en 2002, nos entamos de l’asociación, yá que poder disponer d’actividaes d’ociu dientro del HUCA ye una de les demandes meyor valoraes per parte de los padres, madres y familiares de los y les menores. Anque la mayor dedicación del proyectu de voluntariáu ye l’acompañamientu hospitalariu, col pasu del tiempu foi afaciéndose a la realidá de les families y les necesidaes de l’asociación. Por cuenta de ello, anguaño esisten distintes opciones de voluntariáu que pueden llevase a cabu en Galbán amás del hospitalariu. Ente ellos taría’l voluntariáu d’educación, collaborando cola actividá de les aules hospitalaries por aciu voluntarios que realicen trabayos de sofitu escolar colos mozos; o voluntariáu d’eventos, como parte de los llabores de sensibilización del cáncer infantil y pa dar a conocer el trabayu de l’asociación los voluntarios de Galbán, ente otros.

El premiu de Voluntariáu Social nació cola vocación de visibilizar el llabor del voluntariáu y como reconocencia a una actividá de calter estraordinariu desenvuelta poles persones voluntaries pertenecientes a una entidá social de la ciudá d’Uviéu, bien nel exerciciu de l’acción a favor de les persones, families o sectores vulnerables; o bien na promoción del voluntariáu social y nel desenvolvimientu de proyectos sociales nos qu’esta forma de collaboración constituya un elementu esencial.

  Categories: