El Conceyu d’Uviéu destina 18.000 euros al programa d’atención psicolóxica a escolares que desenvuelve Médicos del Mundu en Palestina

La Xunta de Gobiernu del Conceyu d’Uviéu celebrada esta selmana pasada, aprobó destinar  18.000 euros al programa d’atención psicolóxica de la población escolar que desenvuelve Médicos del Mundu na Gobernación de Jericó- Palestina.

La ONG solicitó la collaboración del Conceyu d’Uviéu para intervenir nesta zona, na que “l’impactu psicolóxicu de la ocupación israelina ye especialmente relevante nos grupos más vulnerables como muyeres y neños, que de cutiu presenten depresión, ansiedá y síntomes de trestornu de estrés post traumáticu, ente otros”.

El programa desenvueltu por Médicos del Mundu, que cunta con un presupuestu total de 50.054 euros, tien como oxetivu dar respuesta a les necesidaes psicosociales de la infancia en situación de vulnerabilidá nes escueles, ameyorar los servicios de protección infantil polo xeneral y ameyorar l’ambiente d’aprendizaxe pa la infancia. En concretu, l’aportación municipal (18.000€) va destinada a sufragar los gastos derivaos de la formación del personal docente y l’alquisición y distribución de kit pa l’atención psicolóxica escolar.