El Conceyu d’Uviéu autoriza la convocatoria de beques de comedor y llibros por 3,2 millones

El Conceyu d’Uviéu autoriza la convocatoria de beques de comedor y llibros por 3,2 millones
25 xineru 11:08 2017 Imprimir

La Xunta de Gobiernu del Conceyu d’Uviéu autorizó esti mes les convocatories de beques pa comedores escolares, almuerzos y compra de llibros de testu que la so cuantía global pal cursu 2017/2018, que según la cifra reservada nel anteproyectu de presupuestos va xubir a 3,2  millones d’euros, lo que supon una medría d’un 10,5 per cientu al respective de lo presupuestao l’añu anterior.

Esta cifra representa una xubida histórica respecto l’exerciciu anterior nun añu condicionáu polos 37,4 millones d’euros que’l Conceyu tien d’abonar polos intereses y delda xenerada pola espropiación del Palacete de Villa Madalena.

El plazu de presentación d’instancies va ser de 15 díes arteros a partir del día siguiente a la so publicación nel Boletín Oficial del Principáu d’Asturies anque pa los alumnos d’Educación Infantil de primera matriculación dichu plazu va ampliase. Anguaño l’equipu de gobiernu caltien el criteriu de progresividad según la renta de les families nes ayudes de comedores y nes beques d’almuerzu qu’enllantó’l cursu pasáu y per primer vegada’l nuevu equipu de gobiernu municipal.

La bonificación progresiva dexa financiar al 100 per cientu les cuantíes d’aquellos solicitantes con menos recursos. Tamién s’establez una bonificación del 90 per cientu como baremu entemediu y una beca del 75 per cientu en función de distintos parámetros como’l númberu de fíos de cada familia. Los ingresos máximos de la unidá familiar fueron calculaos atendiendo a la cuantía fita pol Institutu Nacional d’Estadística como estragal de probeza y al tipu d’unidá familiar. El sistema anterior nun garantizaba una distribución xusta de los recursos públicos.

Una de les novedaes introducíes na convocatoria d’anguaño ye l’apertura d’un plazu escepcional p’aquelles solicitúes presentaes fora de plazu ordinariu y estraordinariu, pensaes p’alumnos procedentes d’otru conceyu que se treslladen col cursu yá empezáu y que cumplan los requisitos de la convocatoria.

  Categories: