El Conceyu d’Uviéu apurre’l IV Premiu de Voluntariáu Social a l’Asociación Galbán

La conceyala d’Atención a les Persones ya Igualdá, Marisa Ponga, presidió la ceremonia d’entrega del  IV Premiu de Voluntariáu Social a l’Asociación Galbán, col que se reconoz a la entidá pol trabayu de los voluntarios colos neños y neñes hospitalizaos n’oncoloxía pediátrica nel HUCA.

La cuarta edición del Premiu al Proyectu de Voluntariáu Social, que cada añu convoca la Conceyalía d’Atención a les Persones ya Igualdá, estremó por unanimidá’l trabayu de l’Asociación Galbán de families de neños con cáncer del Principáu d’Asturies. La selmana pasada, la conceyala responsable de l’área, Marisa Ponga, fixo entrega del premiu a los representantes de la entidá nel Palaciu d’Esposiciones y Congreso Ciudad d’Uviéu, pol llabor de los sos voluntarios colos neños y neñes hospitalizaos n’oncoloxía pediátrica nel HUCA, onde se centralicen tolos casos de cáncer infantil del Principáu.

Los voluntarios de l’asociación realicen talleres y actividaes nel Hospital Universitariu Central d’Asturies (HUCA) con 37 neños y neñes hospitalizaos n’oncoloxía pediátrica trés díes per selmana y sábados alternos. Na planta d’oncoloxía pediátrica disponen d’un espaciu compartíu con diverses entidaes de voluntariáu que-yos dexa desenvolver actividaes consistentes na realización de talleres de xuegu, manualidades, etc. colos neños, neñes y adolescentes hospitalizaos.

El xuráu foi presidíu pola conceyala Marisa Ponga, y tuvo compuestu amás por Lola Menéndez Oliva, coordinadora de see autonómica de Médicos del Mundu Asturies, entidá ganadora en 2017, y pola xefa de sección de Servicios Sociales, Migración ya Igualdá, Cristina Calviño.

El proyectu de voluntariáu de Galbán creose en 2002, nos entamos de l’asociación, yá que poder disponer d’actividaes d’ociu dientro del HUCA ye una de les demandes meyor valoraes per parte de los padres, madres y familiares de los y les menores. Anque la mayor dedicación del proyectu de voluntariáu ye l’acompañamientu hospitalariu, col pasu del tiempu foi afaciéndose a la realidá de les families y les necesidaes de l’asociación. Por cuenta de ello, anguaño esisten distintes opciones de voluntariáu que pueden llevase a cabu en Galbán amás del hospitalariu. Ente ellos taría’l voluntariáu d’educación, collaborando cola actividá de les aules hospitalaries por aciu voluntarios que realicen trabayos de sofitu escolar colos mozos; o voluntariáu d’eventos, como parte de los llabores de sensibilización del cáncer infantil y pa dar a conocer el trabayu de l’asociación los voluntarios de Galbán, ente otros.

El premiu de Voluntariáu Social nació cola vocación de visibilizar el llabor del voluntariáu y como reconocencia a una actividá de calter estraordinariu desenvuelta poles persones voluntaries pertenecientes a una entidá social de la ciudá d’Uviéu, bien nel exerciciu de l’acción a favor de les persones, families o sectores vulnerables; o bien na promoción del voluntariáu social y nel desenvolvimientu de proyectos sociales nos qu’esta forma de collaboración constituya un elementu esencial.