El Conceyu de Bimenes convoca la novena edición del Concursu de gaiteros y gaiteres mozos

15 mayu 07:52 2008 Imprimir

El Conceyu de Bimenes ta acabante convocar la novena edición del Concursu de gaiteros y gaiteres mozos de Bimenes, nel que van poder tomar parte tolos concursantes que quieran, siempres a títulu personal y teniendo menos de 21 años el día 30 de xunu del añu 2008. Nel Concursu va afitase un llímite máximu de 10 participantes, que van ser almitíos por rigurosu orde d’inscripción. Sicasí, una vegada superada esta cifra na fase d’inscripción quedará abierta una llista de reserva pa cubrir posibles baxes. La fecha tope pa la receición de les inscripciones ye’l llunes 30 de xunu de 2008 a les 20:00 hores.

La rellación de participantes fadráse pública’l martes 1 de xunetu de 2008, nun actu abiertu al públicu que se va facer na Casa la Cultura de Bimenes a les 12:00 hores. Nesti actu va sortease l’orde de participación nel certa.

El concursu va ser el sábadu 5 de xunetu de 2008, a les 18:00 hores, en Xenra (Bimenes), nel marcu de la XII Fiesta de la Oficialidá de la Llingua Asturiana. El concursante tendrá de presentase, como mínimo, 30 minutos enantes del entamu pa interpretar dos temes, ún obligatoriu de la llista dada pol Conceyu y otru que pue ser llibre. Los temes han de ser interpretaos ensin añadíos nin supresiones son Muñeira de Remis, Floréu de Remis, Diana floriada de Veriña, Fandangu puntiáu, Muñeira Barganaz, Xota’l Centru, Marcha’l Tao, Alborada’l paxarín, Xota Pumariega o Carretera d’Avilés.

Los concursantes han d’emplegar como instrumentu la gaita tradicional asturiana (d’un sólu roncón) en cualesquiera de les sos modalidaes. Tamién ye obligatoriu l’usu del traxe tradicional asturianu.

Van dase trés premios, con valos de 300, 200 y 100 euros. El Xuráu tará compuestu por miembros cualificaos, designaos pol Conceyu de Bimenes y presidíu pol alcald. El fallu sedrá inapelable.

La propuesta d’inscripción tien de formalizase unviando per corréu los datos personales nuna fueya (onde constarán nome y apellíos, direición y teléfonu de contautu), amás d’una fotocopia del DNI a: Casa la Cultura de Bimenes IX Concursu de Gaiteros y Gaiteres Mozos – Santuyano s/n. CP 33527 – Bimenes. Pa cualesquier dulda esiste un teléfonu de contactu, el 680 114 090.

  Categories:
Loading Facebook Comments ...