El conceyu d’Ayer amplía la programación de branu

by redacción asturnews | agosto 21, 2020 10:32 am

El Conceyu d’Ayer va enllargar el programa d’actividaes en Fontes d’Iviernu hasta finales de setiembre, nun branu nel que más de 1.300 persones quedaren en llista d’espera pa participar nes rutes teatralizadas entamaes pel área de turismu.

El Conceyu d’Ayer decidió ampliar un mes más el programa d’actividaes branices, que se va desenvolver hasta finales de setiembre. Esta decisión ta motivada pol ésitu de les actividaes ufiertaes y pol ábanu de reserves, qu’enchió toles previsiones.

Les actividaes llevaes a cabu na Estación Iverniza Fontes d’Iviernu tuvieron una bien bona acoyida per parte del públicu, llegando a xenerar llista d’espera en toles salíes, por ello siguiránse ufiertando rutes empuestes ya interpretatives nes instalaciones d’esti equipamientu, en concretu, talleres de iniciación a la orientación nel monte y rutes nocherniegues sol títulu “Fuentes d’Iviernu a la lluz de la lluna”.

Na primera de les actividaes los participantes van aprender distintes técniques d’orientación, y l’usu ya interpretación de mapes y brúxula, que-yos va garantizar unes conocencies básiques pa realizar actividaes de monte en condiciones de seguridá. Na segunda, va amosase’l curiosu de la estación n’hores crepusculares xubiendo hasta La Llomba (1.950 m), llugar qu’ufierta una escepcional panorámica del cordal Cantábricu y un atapecer insólitu.

Asina, dase continuidá al plan de desestacionalización diseñáu pol consistoriu ayerán pa poner en valor la estación mientres los meses de branu y convertila nun puntu de referencia turística tamién nesta dómina del añu, ufiertando actividaes singulares venceyaes al esfrute de la naturaleza y del monte.

Amás, tamién se van ampliar en septiembre les funciones de les rutes teatralizaes “Xurbeo Mitolóxicu” y “Los secretos del Pozu San Fernando”. L’acoyida d’esta nueva actividá per parte del públicu superó toles mires, yá que en menos d’una selmana escosáronse les places disponibles en toles salíes programaes hasta finales d’agostu y xeneróse una llista d’espera de 1.366 persones. Por esti motivu, el Conceyu decidió ufiertar ocho salíes más, que van tener lugar todo les fines de selmana del mes de setiembre.

La mitoloxía asturiana ye protagonista na ruta teatralizada “Xurbeo Mitolóxicu”, un percorríu onde la realidá entemez cola ficción. La puesta n’escena axunta al busgosu, el nuberu, el diañu burllón, la vieya, la xana…, seres que interactúan colos participantes nun espectáculu sorprendente que cautivó a toos aquellos visitantes que participaron hasta la fecha.

En “Los secretos del Pozu San Fernando” el públicu fai un viaxe nel tiempu de la mano de José Tartière, fundador de la Sociedá Industrial Asturiana Santa Bárbara, y de Martina, una vecina del pueblu. Un risible accidente ye’l responsable d’esti viaxe nel tiempu, que fai posible la llegada del empresariu a la dómina actual. Mientres les dos hores que dura la representación, les rises y l’humor tán garantizaos.

La Conceyala de Turismu del Conceyu d’Ayer, Elena Zapico Pando, señaló que “el gobiernu local fizo una puesta clara y decidida para favorecer la desestacionalización de Fontes d’Iviernu ufiertando actividaes mientres los meses de branu y tamos bien satisfechos coles resultancies”. Coles mesmes, añedió “queremos que la estación sía un puntu de referencia turística tamién pel branu”. La conceyala apuntó que “l’ábanu de reserves y la llarga llista d’espera de persones comenenciudes en participar nes actividaes programaes son la prueba del ésitu del programa branizu diseñáu pel área de turismu municipal”.

Source URL: http://asturnews.com/el-conceyu-dayer-amplia-la-programacion-de-branu/