Portada Turismu El conceyal de Turismu anuncia una Axencia de Promoción económica pa rellanzar el Turismu

El conceyal de Turismu anuncia una Axencia de Promoción económica pa rellanzar el Turismu

by redacción asturnews

El conceyal uviéin de Turismu fizo anuncia esta selmana en FITUR de la creación de Xornaes específiques y xuntes d’ex Erasmus pa potenciar la imaxe de la ciudá, al tiempu qu’una Axencia de Promoción Económica.

El conceyal Rubén Rosón presentó esta selmana, en Madrid, na Feria Internacional de Turismu (FITUR) les nueves estratexes de turismu d’Uviéu, en redol a les que va trabayar el Conceyu de la capital. La primera d’elles, esplicó, lleva como epígrafe “Redescubriendo los raigaños” y va afondar na importancia del Prerrománicu, el Camín Primitivu de Santiago y el refuerzu del Uviéu Antiguu y del conxuntu históricu compuestu pol Muséu de Belles Artes, el Muséu Arqueólogico y l’Universidá.

Siguiendo esti oxetivu, adelantró, “van crease nuevos recursos capaces de potenciar y trabayar nos aspeutos antes mentaos y tamién na riqueza esistente na zona rural”, con exemplos como’l conxuntu históricu de Olloniego, Les Caldes y el so balneariu, y tamién el turismu basáu nel patrimoniu industrial del conceyu, cola Fábrica de Gas, la Fábrica d’Armes o l’Alfarería de Faru como trés de los sos grandes esponentes.

Tamién va potenciase la llegada d’estudiantes estranxeros a Uviéu, ciudá universitaria. Asina, el conceyal adelantró la intención del equipu de gobiernu de potenciar y sofitar la creación de Xornaes específiques y xuntes d’ex Erasmus y estudiantes de promociones pasaes porque, na so opinión, “ellos son los carteros d’Uviéu. La so conocencia de la ciudá y el conceyu llega bien llueñe gracies a los sos testimonios”.

El conceyal concluyó la so intervención especificando’l terceru de les exes nos que se va trabayar en materia de turismu n’Uviéu y destacó que “a partir d’anguaño vamos incidir na necesidá d’una política de diálogu, fonda y honesta, con tol sector”. Rosón anunció pa ello la creación d’una Axencia de Promoción Económica pa trabayar en Turismu, Congresos, Comerciu y los negocios d’entamadores y va trabayar na creación d’una marca propia d’Uviéu dientro del gran paragües de Turismu d’Asturies y de un portal específicu de Turismu”.

 

Tamién te podria gustar