El conceyal de Cultura presenta los actos del 125 Aniversariu del Teatru Campoamor

El conceyal de Cultura del Ayuuntamientu d’Uviéu presentó los actos del 125 Aniversariu del Teatru Campoamor, “un partu cultural n’homenaxe a la ciudadanía con una actividá de lo más variada” sigún dixo al tiempu qu’anunciaba l’entamu d’una programación que nun ta pesllada del too pero que con un presupuestu de 400.000 euros va incluyir actuaciones como les de Rodrigo Cuevas o Indio Martínez.

El conceyal y presidente de la Fundación Municipal de Cultura, Roberto Sánchez Ramos presentolos esta selmana con Ánxeles Rivero Velasco, Directora de La Nueva España y Ernesto Barriu, Director Delegación Norte de Mediu Ambiente d’Asturies y Cantabria de FCC. El conceyal entamó asegurando qu’había dos posibilidaes de celebrar los 125 años del Campoamor: “Dende’l 17 de setiembre de 2017, fecha na que se cumple l’aniversariu, o con nueve meses d’actividaes… escoyimos la última opción, un partu cultural que’l so nacencia tien como oxetivu revitalizar esti gran contenedor cultural y rindir homenaxe a Uviéu, a l’asturianía y a la ciudadanía”. Sánchez Ramos recordó que’l ciclu d’actividaes empezó, el pasáu 12 d’abril, col homenaxe al tinu Casal y apuntó que “amás de los actos que se van llevar a cabu nel Teatru, va haber otros dos escenarios, l’Auditoriu y el Teatru Filarmónica”. La programación, qu’entá nun ta cerrada del tou, indicó “ye lo más variada posible, ópera, zarzuela, danza, pero tamién lliteratura, cine, jazz, ciencia o una esposición, en collaboración col Conceyu de Navia, sobre Ramón de Campoamor”.

Faciendo fincapié na importancia “que ta teniendo la producción propia” nes actividaes programaes el responsable municipal de Cultura destacó, “la doble nueche de San Xuan que, amás de la tradicional foguera, va incluyir na plaza de la Catedral una gran “Carmina Burana” na que van participar 200 persones de decenes de coros, la Uviéu Filarmonía…”. Tamién destacó’l Festival de branu, les Nueches en blancu… y, como novedá, “l’I Festival de Bandes de Música del Camín Primitivu de Santiago”.

Con un presupuestu de 400.000 euros, el 125 Aniversariu tamién va incluyir les actuaciones de Rodrigo Cuevas o Indio Martínez. Amás recupérase’l Salón de Té pa alderiques lliterarios, retómense les visites teatralizaes y pal públicu infantil tamién hai actividaes, como’l conciertu de “Cantajuegos”. Ensin escaecer el teatru. Según el conceyal de Cultura “en 2015 el Conceyu d’Uviéu invirtió en teatru 95.000 euros; y cuando remate anguaño van ser 400.000”.

Ánxeles Rivero destacó la importancia que l’aniversariu “supon pa tolos que trabayen en La Nueva España” y sorrayó el sofitu de la empresa “al Aniversariu como nun podía ser d’otra manera, como asina lo faemos a diariu coles actividaes culturales n’Uviéu”. De la mesma opinión amosóse Ernesto Barriu, quien estimó al Consistoriu y a l’área de Cultura “la oportunidá de participar nel patrociniu d’esti aniversariu”.