El conceyal de Cultura d’Uviéu cifra en 13 millones el presupuestu cultural

El conceyal de Cultura d’Uviéu cifra en 13 millones el presupuestu cultural
23 febreru 09:14 2016 Imprimir

El proyectu presupuestariu pa Cultura del Ayuntamientu d’Uviéu xube a más de 13  millones y contempla la celebración de dos “Noche en Blanco”, inversiones nos teatros Campoamor y Filarmónica, subvenciones pa la creación y l’apueste pola llingua asturiana como referencies cimeres.

El conceyal de Cultura, Roberto Sánchez Ramos, tres la comisión d’analís del proyectu presupuestu, esplicó les partíes correspondientes a la so área, que nel total xube a 13  millones 23 mil euros, y sorrayó’l so apueste pola llingua  con “un conveniu por valor de 24 mil euro cola Academia de la Llingua pa potenciar l’asturianu na actividá municipal” y el desenvolvimientu de cursos y actividaes que fomenten el so usu.

El conceyal empezó la so intervención contextualizando cómo se xestó esti proyectu presupuestariu, con inconvenientes serios, al  tar interveníos per Bruxeles, por midíes que beneficien a los grandes bancos.  Nesi contestu, el conceyal defendió que col proyectu presupuestariu de Cultura pa 2016, van potenciase les actividaes culturales y festexos na ciudá. Nesti sentíu anunció que “pa San  Mateo toles actividaes musicales van ser gratuites”, ente elles, la ufierta que se va desenvolver pa homenaxar al artista Tinu Casal.

El conceyal sorrayó tamién como novedaes la celebración, los  díes 22 y 23 de xunetu de “Les Nueches en Blanco”. Dos xornaes, pa “nun contraprogramanos a nós mesmos” que van tener llugar trés meses antes de lo habitual pa potenciar el Camín de Santiago, (cola so celebración en redol al Día de Santiago) y pa promocionar la ciudá como destín turísticu pel branu.

Sánchez Ramos siguió asegurando que gracies a esti presupuestu, espacios  como’l Campoamor van allugar, amás de la ufierta clásica (danza, ópera y zarzuela), otru tipu d’actividaes, como’l teatru, el cine y el  “meyor jazz del país”  coles mires d’atraer a esti Teatru nuevu públicu.  Amás, añedió, “vamos  buscar la descentralización d’actividaes”.
Nel capítulu d’inversiones, Sánchez Ramos destacó que se van destinar 128 mil euros a “dos  equipamientos fundamentales n’Uviéu” como son el Campoamor y la Filarmónica, y que la partida pal Muséu de Belles Artes aumentó en  150 mil euros. Una medría col que, según el conceyal, va potenciase estes  instalaciones “qu’hasta agora tenía problemes pa comunicar los dos partes del muséu”.

Ente otres partíes el responsable de Cultura incidió na importancia de la convocatoria de “beques y subvenciones pa la creación” a les que van poder optar persones venceyaes al arte y la cultura.

  Categories: