El conceyal de Cooperación d’Avilés aconceyó cola ONG colombiana Pueblu y Dignidá

El conceyal de Cooperación d’Avilés aconceyó cola ONG colombiana Pueblu y Dignidá
13 mayu 09:39 2022 Imprimir

El conceyal de Cooperación Internacional, Jorge Luis Suárez, axuntóse esti xueves con una representación de la ONG colombiana Pueblu y Dignidá. Nel alcuentru, que se desenvolvió al mediudía nel Conceyu d’Avilés, participaron l’activista Lola Villacob y les abogaes Mª Anxélica Prada y Daniela Stefanía Rodríguez.

Dambes lletraes tán especializaes na defensa de derechos humanos y son activistes feministes. Mª Anxélica Prada ye, amás, profesora auxiliar de la Facultá de Xurisprudencia de la Universidá del Rosariu en Bogotá. Pela so parte, Daniela Stefanía Rodríguez trabaya nel Comité de Solidaridá colos Presos Políticos y ye coordinadora na Área de Xusticia Transicional de Colombia.

La xunta celebróse con un doble motivu. Per un sitiu, encetóse la situación actual en materia de derechos humanos en Colombia y, por otru, llamóse l’atención sobro la situación de les muyeres nel país, poniendo en valor el so papel na construcción del actual procesu de paz.

Pueblu y Dignidá ye una ONG ensin ánimu d’arriquecimientu compuesta por persones solidaries y sensibles a la situación de violación de Derechos Humanos na qu’inda viven numberosos pueblos y naciones.Desenvuelven en Colombia diversos proyectos de cooperación cola collaboración de l’Axencia Asturiana de Cooperación al Desenvolvimientu y los Conceyos de Xixón, Avilés y Uviéu. Tamién realicen eventos de sensibilización y denuncia en relación colos Derechos Humanos.

Dende va años, esta ONG ye beneficiaria de les subvenciones en concurrencia competitiva de Cooperación al Desenvolvimientu qu’añalmente se xestionen dende la Conceyalía de Participación Ciudadana y Cooperación Internacional.

  Categories: