El Colexu Cabanaquinta foi protagonista esti sábadu del programa NOS de la TPA

11 mayu 23:56 2007 Imprimir

El Colexu Públicu de Cabanaquinta, na capital del Conceyu d’Ayer, foi protagonista de la emisión d’esti sábadu a les 12:30 del programa NOS de la TPA, que dirixe y presenta el direutor d’Asturnews, Próspero Morán. El direutor del Colexu, Baltasar Fernández Fanjul, y la profesora de llingua asturiana, Angélica Suárez, foron los encargaos xunta los escolinos ayeranos de danos a conocer cómo se trabaya de llunes a vienres cola cultura de nueso nesi colexu.

El primeru n’apaecer na programación de la TP foi’l Colexu La Canal de Lluancu, protagonista del programa “Nós” qu’emitió a les 12,30 la TPA na segunda selmana d’abril. Los escolinos foron los encargaos de dir desplicando la cadarma del Colexu y les actividaes que nelli desendolquen, nun modelu que tolos meses dirá repitiéndose visitando colexos en Mieres, Carreño o Xixón, por mentar los primeros que dirán visitándose.

La programación en llingua asturiana sigue afitándose penrriba la que s’emite en castellán na TPA. Los datos caberos d’abril pasáu punxeron a los tres programes n’asturianu alrodiu del 9 por ciento d’audiencia, calteniendo los bonos datos que tien la programación n’asturianu dende qu’entamare.

  Categories:
Loading Facebook Comments ...