El Coleutivu Softastur recoyó en Xixón el Premiu Andrés Solar

21 avientu 04:52 2008 Imprimir

Esti sábadu 20 d’avientu, a les 19:30 hores, nel Salón d’Actos del Antiguu Institutu de Xixón, la Xunta pola Defensa de la Llingua Asturiana entregó los sos Premios Andrés Solar nun actu qu’enllenaba’l salón onde tamién actuó’l grupu DRD. David Melendi Palacio, Decanu del Colexu Oficial d’Informáticos del Principáu d’Asturies, intervino tamién nel actu pa falar de la importancia y les posibilidaes de la presencia de la llingua asturiana nel ámbitu de les tecnoloxíes nueves.

El colectivu Softastur, ganador del Pegoyu pol so trabayu de normalización del asturianu nesi ámbitu, fizo una intervención visual que presentó Mikel y onde esplicaron cómo trabayen enseñando dalgunos de los frutos d’esi llabor. Arriendes d’esto, la Xunta pola Defensa de la Llingua Asturiana (XDLLA) lleó el so tradicional discursu añal, onde fizo repasu a tolo referente a la llingua asturiana y el so futuru nel últimu añu.

La parte musical vino de la mano de DRD. El grupu de folk ye una de les bandes de más sonadía na escena musical asturiana. Vienen acabantes de sacar el so segundu trabayu discográficu, del que van tocar delles pieces nel actu.

Los Premios Andres Solar algamaben nesti 2008 la so 24 edición. Como nos sos ventricuatro años de vida, los premios tienen una vertiente doble: d’un llau la Xunta premia a una entidá o persona que rescample nel mesmu añu pol so llabor en defensa del asturianu. Y esti reconocimientu materialízase n’ElPegollu, que esta ocasión foi pa Softastur, una plataforma de programadores y traductores en llingua asturiana dedicada a la traducción y desarrollu de software llibre n’asturianu

.

Ente los proyectos de Softastur tán el istema OperativuUbuntu, el Firefox en llingua asturiana, y el proyectu MediaWiki. Pa la XDLLA ye mui de valorar el trabayu constante y desinteresáu de les persones que formen parte de Softastur, abriendo camín pal usu de la llingua asturiana nel ámbitu de les tecnoloxíes nueves, amosando una vez más que l’asturianu tien y en tolos ámbitos de la vida moderna.

  Categories:
Loading Facebook Comments ...