Portada Conceyos El Club de Llectura d’Avilés dedica so última sesión a Valeria Luiselli

El Club de Llectura d’Avilés dedica so última sesión a Valeria Luiselli

by redacción asturnews

El Club de Llectura “Una habitación propia”, entamáu pola conceyalía d’Igualdá, pieslla sos puertes antes del branu cola postrera de les cites del ciclu que, dende febreru, dedicó a escritores llatinoamericanes orellaes polos cánones. La protagonista va ser Valeria Luiselli y el so llibru “Los neños perdíos”, nuna xunta que va tener llugar nel Palaciu de Valdecarzana, esti llunes 27 de xunu, a les 18 hores.

Raisa Gorgojo Iglesias, doctora en Filoloxía Románica pola Universidá d’Uviéu, va impartir una conferencia sobro l’autora mexicana, nacida en Ciudá de México en 1983, y sobre un trabayu, el de “Los neños perdíos”, nel qu’enceta la traxedia qu’acompaña a los neños suramericanos qu’emigren a los Estaos Xuníos.

Diz el periodista John Lee Anderson nel prólogu d’esti ensayu en base a 40 entrugues, que nel llibru “nun hai respuestes, tan solo más entrugues. Les entrugues formulaes por Valeria Luiselli son les suyes, les de la so fía, y les que s’atopa nel cuestionariu d’almisión pa los neños indocumentados, el documentu ellaboráu por un grupu d’abogaos migratorios estadounidenses pa entrevistar a les decenes de miles de neños centroamericanos que lleguen cada añu a los Estaos Xuníos, en siendo traficados pola frontera mexicana”. Recuerda Anderson que “estos neños son los miembros más vulnerables d’un continuu éxodu de centroamericanos que fuxen de la probeza y la violencia nes sos derruidas naciones, cola esperanza d’atopar una vida meyor nos Estaos Xuníos. Munchos de los neños son violaos, asaltaos, y dalgunos son asesinaos nel camín”.

Sol lema ‘Habitar los marxes’ el ciclu, coordináu por Robeca Fernández Alonso, llicenciada en Filoloxía Hispánica y doctora n’Estudios de la Muyer pola Universidá d’Uviéu, analizó a cinco muyeres que, ante’l canon lliterariu imperante nel sieglu XX, fueron ignoraes nes sos creaciones lliteraries y viéronse obligaes a movese n’otros ámbitos, d’ende’l títulu que da nome al  ciclu.

Tamién te podria gustar