El Club de Lectura Bance Candamo dedicó la so xunta a la escritora Carme Riera

El Club de Lectura Bance Candamo dedicó la so xunta a la escritora Carme Riera
24 febreru 09:12 2021 Imprimir

Torna’l Club de Lectura Bance Candamo, con una sesión en redol a la escritora mallorquina Carme Riera. La xunta tuvo llugar de forma telemática, al traviés de l’aplicación Jitsi Meet, esti martes 23 de febreru, a les 17.00 hores y ye la primera les actividaes d’esti semestre.

Les y los integrantes del club comentaron dos de les más renombraes obres de la novelista, miembru de la Real Academia de la Llingua, y Premiu Nacional de les Lletres Españoles: “Nel postreru azul”, pola que recibió coles mesmes el Premiu Nacional de Narrativa en 1995, y “Voi Vengar la to muerte”.

“Nel postreru azul” trata les minoríes escorríes por motivos relixosos y l’intolerancia, al recrear cómo vivieron y morrieron un grupu de criptojudíos mallorquinos nel sieglu XVII, nun mundu nel que s’entemecen inquisidores, aristócrates, comerciantes, llabradores, bandoleros y prostitutes envolubraos n’una trama que novela acontecimiento históricos. Publicada en 1994 y multipremiada, en 2019, al cumplise 25 años de la so publicación, presentóse una nueva edición revisada pola autora.

Pela so parte, “Voi Vengar la to muerte” (2018), ye la so última incursión na novela negra. Nella, la exdetective privada Elena Martínez remembra un casu nel que sabe que contribuyó a que se condergara a inocentes. Asitiada na España de 2010, en plena puxanza de la corrupción, la protagonista esquiza na desapaición d’un empresariu catalán investigáu por blanquéu y fuximientu de capitales. Riera amuesa la degradación d’aquellos que, abelugaos tres el poder, creen poder actuar con impunidá en tolos ámbitos.

  Categories:
Loading Facebook Comments ...