Portada Escéniques El Circu’l Sol cellebra en Xixón el so vixésimu cumpleaños

El Circu’l Sol cellebra en Xixón el so vixésimu cumpleaños

by asturnet

El Circu’l Sol quier facer partícipe al públicu asturianu del so vixésimu cumpleaños. La compañía artística canadiense, que mañana entama a montar en Xixón el recintu de 20.000 metros cuadraos nel qu’ufrirá funciones hasta mediaos de xunetu, festexa los sos primeros venti años d’esistencia con un descuentu xeneral del 20 por cientu en toles entraes que se merquen hasta la medianueche de güei en caxeros, n’internet y n’establecimientos collaboradores.

Asina, los espectadores que quieran aforrar la quinta parte del preciu de les llocalidaes -a la venta a tarifes d’ente 24 y 57 euros, según l’allugamientu dientro de la carpa y el día del espectáculu- podrán alquirir güei la so entrada nos centros d’El Corte Inglés d’Asturies, nos caxeros automáticos de La Caixa y na propia web del Circu, www.cirquedusoleil.com.

El desembarcu efectivu de la premiada compañía canadiense en Xixón empieza al mediudía de mañana, col llevantamientu en tarrenos del puertu d’El Musel de la carpa qu’acoyerá les representaciones hasta mediaos de xunetu, una instalación de 50 metros de diámetru, 17 d’altor y aforu pa 2.500 persones.

El Circu’l Sol asitiará amás na zona portuaria de Xixón un complexu ambulante d’oficines, taquilles, una escuela propia y una cocina collectiva, nun recintu qu’ocupa 20.000 metros cuadraos y cuyu montaxe emplegará a 60 técnicos a lo llargo de más d’una selmana.

El ‘Cirque du soleil’ aporta a Asturies col espectáculu ‘Saltimbanco’, una cellebración de la vitalidá que propón una nueva visión del entornu urbanu al traviés del optimismu y el xuegu. Xixón, con 26 funciones programaes, conviértese na quinta ciudá del Estáu español qu’acueye a la compañía canadiense, qu’hasta agora visitara namás Madrid, Barcelona, Sevilla y Bilbao.

Tamién te podria gustar