El cine del Atenéu proyecta ‘Il divo’ nel so ciclu Política y políticos

06 marzu 12:53 2019 Imprimir

El CMI Atenéu La Calzada trai esti miércoles 6 de marzu a les 19 hores, al so salón d’actos, la proyección de la película italiana Il Divo, dientro del so ciclu de política y políticos.

El cine y la política tán xuníos por una relación entrevesgada, dende siempres el primeru sirvió como vehículu y propaganda, pero tamién contribuyó al cambéu social y supo sollertar sobro problemes económicos, sociales y políticos. Non solo’l cine ye políticu por intención, tamién lo ye por accidente, les películes son reflexu de la sociedá, de los sos enclinos, les sos moliciones y, qué tanto, de les sos idees polítiques.

Al marxe d’esa relación ente cine y política, esta postrera defínese, ente otres acepciones, como l’actividá de quien rixen o aspiren a rexir los asuntos públicos, y los políticos y polítiques per tantu les persones qu’exercen eses actividaes. Superando estes sencielles definiciones llegamos a l’actual realidá na que s’entemez el compromisu social pol bien común con otros condicionantes más personales y que poco pueden tener que ver con esi bien xeneral. Este queremos que sía unu de los ángulos del alderique que proponemos como actividá complementaria al ciclu de cine.

Como actividá complementaria al ciclu Política y políticos, el 28 de marzu va tener llugar una mesa d’alderique formada por políticos as n’activu nos niveles local y autonómico.

Il divo
Italia, 2008. Dir. Paolo Sorrentino. 110′.

Contundente semeya de Giulio Andreotti, xefe del gobiernu italianu n’hasta siete ocasiones y máximu representante de la Democracia Cristiana, magníficamente interpretáu por Toni Servillo. Anque presentáu como un políticu grotesco y enferronao al poder, Sorrentino nun despinta cierta almiración escontra’l personaxe na so película, na que se narranlas presuntes relaciones de Andreotti cola mafia siciliana, los delitos polos que foi procesáu nos años 90 y absueltu por falta de pruebes.

 

  Categories: