Portada Cine El Cine de los Martes d’Avilés proyecta “Destroyer”

El Cine de los Martes d’Avilés proyecta “Destroyer”

by redacción asturnews

Esti martes a les 20:15 nel Auditoriu de la Casa de Cultura, el Cine de los Martes d’Avilés proyecta “Destroyer”, con una aplaudida Nicole Kidman como protagonista, nun segundu periodu del ciclu que se va estender hasta’l mes de xunu, tán programaes nueve películes de seis países distintos.

Erin Bell ye una detective incapaz de perdonase a sí mesma los erros que cometió nel pasáu. Colos años, la so prioridá ye reconducir la difícil relación que tien cola so fía adolescente. Cuando’l líder d’una banda criminal na qu’ella se infiltró de moza torna a la ciudá, Erin va atopar la so última oportunidá para redimise y garantizar un futuru meyor para la so familia. Esti martes a les 20:15 nel Auditoriu de la Casa de Cultura.

El segundu ciclu de 2019 entamó cola proyección de la película británica Beast, de Michael Pearce. A esta película sumense otros 8 títulos con numberosos galardones y nominaciones en diversos festivales internacionales.

Nueve películes con enorme carga autoral y diversidá temática, dende’l biopic al drama social, pasando pol romance y el cine documental. Un cartelu nel que destaquen les muyeres detrás de les cámares, con nomes como Karyn Kusama (nel Cine de los Martes yá se proyectó so opera prima “La Invitación), Nadine Labaki, Marielle Heller (con una de les películes que más destacaron anguaño nes nominaciones de los Oscar), Sara Colangelo o Pernille Fischer.

Les entraes para caúna de les películes tienen un preciu únicu de 3 euros y puen adquirise na taquilla de la Casa Municipal de Cultura, n’horariu de llunes a vienres, de 11:00 a 14:00 y de 18:00 a 21:00 hores, y los sábados, de 11:00 a 14:00 hores.

El públicu d’El Cine de los Martes sigue siendo fiel a la cita cinematrográfica, que nel anterior trimestre de xineru a marzu vendió un total de 2172 entraes, lo que supon unos 242 asistentes per sesión. La película que rexuntó a un mayor númberu d’espectadores foi “The Old Man and The Gun”, proxectada’l martes 19 de marzu, con 331 asistentes.

Ver calendariu

Tamién te podria gustar