Plástiques “El cine de la Transición en 20 cartelos” protagoniza la XVIII edición del Avilés Acción Film Festival by redacción asturnews 10 de mayu, 2019 written by redacción asturnews 10 de mayu, 2019 105 El festival de cine Avilés Acción vuelve xunise col Institutu Cervantes pa conformar una esposición de 20 cartelos de cine cola Transición como filu conductor. Esta exhibición podrá visitase a partir d’esti 10 de mayu, nel pisu -1 de la Casa Municipal de Cultura, y la so inauguración, que va tener llugar a les 19 hores, quíxose enmarcar dientro de la celebración de la Selmana del Audiovisual Asturianu. «Güei estrénase una película qu’estrena llibertá». D’esta manera espublizábase en prensa, el 1 de payares de 1976, Cantares para dempués d’una guerra, de Basilio Martín Patino. El filme, que fuera censuráu pola Alministración franquista en 1971, a la fin podía vese en pantalla al poco menos d’un añu de la muerte de Franco. La película convertíase, años dempués de so finalización y ensin prevelo’l so director, en símbolu de la llegada de los nuevos tiempos tres la muerte del dictador. Mientres los años de la Transición n’España (1974-1982), el cine participó de manera activa nos cambeos que s’asocedíen nel país. Supo, de manera especial, captar los diversos estaos d’una sociedá engarrada a un ferrial pasáu, un inestable presente y un futuru inciertu. Numberoses películes entamaron, dende perspectives novedoses, xuna revisión del pasáu recién, principalmente, de la Guerra Civil (1936-1939) y de la dictadura. Otres, otra manera, encetaron asuntos d’actualidá como, por casu, la política, cuestiones de xéneru y, poques gracies, la acabante estrenar llibertá d’espresión, que la so materialización más directa (y superficial) fueron les películes que, mientres un curtiu periodu, circularon clasificaes como «S» (soft-core porn). El cine de la dómina vehiculó, de manera contundente, el sentir d’una sociedá qu’espertaba tres décades de silenciu y represión. Y facíalo amosando cares bien diverses: dende’l conservadorismu de determinaes «comedies sexis» hasta’l tonu punk de les primeres películes de Pedro Almodóvar; pasando pola práctica de la llibre espresión per parte del cine documental y militante, según pol protagonismu dáu nel cine quinqui a una mocedá qu’hasta entós permaneciera periférica. El cine español d’estos años, como los sos propios cartelos, fala de los intensos cambeos qu’asumió la sociedá española casi nuna década; y, sobremanera, de los tresformamientos d’un mediu que, magar tener na televisión el so principal competidor, entá allugaba poder para rexuntar nes sales a un públicu que, según les cróniques, llegaba n’ocasiones a responder con vehemencia a lo amosao en pantalla. La esposición podrá contemplase mientres l’horariu d’apertura de la Casa Municipal de Cultura: de llunes a sábadu, de 9 a 21 hores, y los domingos, de 9 a 14 hores. 0 FacebookTwitterPinterestEmail Anterior La Fiesta del Cine torna del 3 al 5 de xunu con entraes a 2,90 euros siguiente Entama n’Avilés un ciclu de cine pa visibilizar el papel femenín Tamién te podria gustar “Nos dominios de trés” homenaxea a la pintora... Avilés reivindica a Trinidad Fernández con mediu centenar... La esposición “Cuerpos albentestate” recueye la creatividá reivindicativa... La Factoría Cultural inaugura Y-LIFE, de Juan Falcón,... La esposición “Dos patries llevo comigo” fai alcordanza... Mieres pon en marcha’l programa de visites al... Una esposición amuesa la evolución de la muyer... Inaugurada la VII Esposición d’Arte Postal n’Avilés, con... El tercer Ciclu d’Ilustración de la Ventana de... Avilés recuerda’l so vertixinosu sieglu XX cola esposición...