El ciclu Cine a la Lluz de la Lluna va acutar files 0 pa trabayadores de supermercaos

El ciclu Cine a la Lluz de la Lluna va acutar files 0 pa trabayadores de supermercaos
12 xunu 11:02 2020 Imprimir

El ciclu Cine a la Lluz de la Lluna va acutar files 0 pa trabayadores de supermercaos en reconocencia al so trabayu mientres la pandemia. El programa, con entrada gratuita hasta completar l’aforu, empieza esti vienres, a la 23 hores, na nueva localización de la plaza del Vascu n’Uviéu, coles midíes de seguridá sanitaries pertinentes y controles d’accesu.

Los y les trabayadores de los supermercaos van tener dos files 0 acutaes nel Ciclu de Cine a la Lluz de la Lluna, entamáu pola Fundación Municipal de Cultura, qu’entama esti mesmu vienres 12 de xunu n’Uviéu. La Fundación Municipal de Cultura, dirixida pol conceyal José Luis Costillas, quier “reconocer con esti xestu’l llabor lleváu a cabu polos y poles trabayadores de los supermercaos mientres la grave crisis sanitaria del Covid 19, cola so esposición permanente y la so dedicación a lo llargo d’estos meses, que toos tenemos d’estimar”. El ciclu qu’empieza esti vienres va cuntar en toles sesiones con dos files 0 acutaes pa los emplegaos d’estos establecimientos, que tendrán d’acreditar la so condición d’emplegaos de supermercaos con tarxetes o fiches identificatives. En cada sesión va informase debidamente a los emplegaos del sector de los asientos reservaos pa ellos y la forma d’entrada, que se va estremar del restu del públicu asistente.

cine-a-la-luz-de-la-luna-junio

El Ciclu de cine al campu “Cine a la lluz de la lluna” entama esti vienres cola proyección  de la película “Amanez que nun ye poco” y con delles novedaes, como la localización escoyida pal mes de xunu, la nueva plaza Estación del Vascu, o la proyección de películes en fin de selmana. El programa va cuntar con 40 sesiones en 16 localizaciones distintes de too el conceyu nes que se van proxectar un total de 29 películes de distintos xéneros. Otra de les novedaes anguaño va ser l’estrictu cumplimientu de les midíes de seguridá y prevención d’andaes impuestes poles actuales circunstancies. Asina, la disposición del aforu va tener un zarru perimetral, va haber señalización de la puerta d’entrada y salida, controles d’accesu regulaos, y l’obligatoriedá de caltener la distancia de seguridá ente asientos impuesta pol Gobiernu. Amás, van asitiase dispensadores de xeles desinfestantes na entrada a la cortil acutada na vía pública y va haber dellos cartelos informativos coles midíes de seguridá impuestes, como la prohibición de cambéu d’asientu o de reserva del mesmu. L’usu de mázcaru ye encamentáu, pero non obligatoriu.

Los asistentes a cada sesión van tener que faer cola pa cada proyección, que se va abrir con aprosimao una hora d’antelación, pa poder llevar a cabu’l control d’accesu y d’asistencia a esti programa. Va haber dos files 0 acutaes pal personal de supermercaos, que van tener qu’acreditar debidamente nel mesmu momentu coles sos tarxetes d’emplegaos al aportar al espaciu de la sesión de cine énte’l personal encargáu del control d’accesu y aforu. Al traviés de señalización y por megafonía va recordase les midíes de seguridá y de prevención sanitaria que va haber que cumplir na asistencia a estes sesiones. Les proyecciones del Ciclu Cine a la lluz de la lluna del mes de xunu van tener llugar a les 23 hores de la nueche na plaza de la Estación del Vascu con entrada llibre gratuita hasta completar aforu.

  Categories: