El CIAA d’Avilés “traduz” la Llei de Protección a la Infancia a llinguaxe comprensible

El CIAA d’Avilés “traduz” la Llei de Protección a la Infancia a llinguaxe comprensible
21 xunu 08:55 2022 Imprimir

El Conseyu Municipal d’Infancia y Adolescencia d’Avilés (CIAA) vieno acabante presentar la traducción de la Llei de Protección a la Infancia y Adolescencia a un llinguaxe comprensible pa la mocedá.

“La llucha contra la violencia na infancia ye un imperativu de derechos humanos”. Asina empieza la nueva Llei de Protección de la Infancia y Adolescencia. Y como tamién ye un derechu de neños y neñes el conocer la llei, los sos propios derechos y les distintes cares de la violencia, el Conseyu Municipal d’Infancia y Adolescencia d’Avilés (CIAA) convertir nun documentu escritu en llinguaxe comprensible y accesible.

Foi presentáu na tarde del miércoles pasáu, nel Espaciu Maqua, cola presencia de l’alcaldesa Mariví Monteserín; la conceyala de Promoción Social, Nuria Delmiro; Antonia Fuentes Moreno, Lletrada del Menor d’Asturies, que supervisó’l trabayu realizáu, y los integrantes del CIAA Carmen Pérez Álvarez, Marta Fernández Correa, Tong Eva Zhou Chen, Hugo Siberón Pérez, Martín Ferrero Capo y Nerea Reyes Alarcón, encargaos de la redacción del documentu.

En xineru, el Conceyu d’Avilés entamó una xornada informativa sobre la Llei, aprobada en xunu pasáu. Y ente les conclusiones de la mesma, surdió la necesidá d’ayudar a neños y neñes a identificar les distintes situaciones de violencia a les que pueden vese espuestos, y de qué ferramientes-yos dota la llei pa encetales. De tala forma, encamentose-y al CIAA la xera de traducir la Llei, centrándose nos puntos más importantes y los que más directamente afecten a los y les menores, convirtiéndola nun documentu afechisco y aclaratorio y, sobremanera, comprensible, útil y efectivu.

La redacción del documentu en 20 páxines sintetiza la complexidá normativa nun llinguaxe atentu, bien visual, nel que neños, neñes y adolescentes van atopar exemplos cenciellos que clarifiquen aspeutos esenciales de la nueva Llei, que los van ayudar a detectar situaciones de violencia y a conocer los derechos que-yos amparen pa encetales.

La Llei orgánica 8/2021, de Protección Integral a la Infancia y l’Adolescencia frente a la Violencia (LOPIVI), aprobada en xunu de 2021, busca combatir tou tipu de violencia fomentando la sensibilización, prevención, detección, protección y arreglu de les víctimes, y convierte a España en pionera y vanguardia de l’atención a la infancia.

La prevención ye l’aspeutu esencial de la Llei, esto ye, actuar primero que s’exerza cualquier situación de violencia. Fomenta los bonos tratos, la necesidá de cuntar con una redolada segura nel que crecer con llibertá y protección, tanto nel ámbitu familiar como nel escolar y educativu. Coles Alministraciones Públiques como garantes de la formación, prevención y detección de la violencia, según la derivación de los neños y neñes afectaos una vegada qu’esta violencia tenga llugar.

El Conseyu Municipal d’Infancia y Adolescencia d’Avilés (CIAA) va faer entrega del documentu a los centros educativos de Primaria, Secundaria y Adolescencia de la ciudá.

  Categories: