El Cervantes va facilitar l’aprendizaxe del español a los refuxaos d’Ucrania

El Cervantes va facilitar l’aprendizaxe del español a los refuxaos d’Ucrania
24 mayu 09:03 2022 Imprimir

L’Institutu Cervantes anunció esti xueves pasáu que va facilitar la enseñanza y espardimientu de la cultura y llingua española a refuxaos ucranianos. La entidá robló un conveniu con Cruz Roja Española col que va apurrir accesu con 6.500 llicencies gratuites a los sos cursos en llínea.

L’alcuerdu pretende integrar a los refuxaos d’orixe ucranianu n’España y facilitar l’aprendizaxe del idioma. Ta empobináu al programa d’acoyida a persones solicitantes de protección internacional de Cruz Roja Española. Tratase del primer conveniu de los que se van formalizar, —al amparu del modelu normalizáu de conveniu ente l’Institutu Cervantes y les comunidaes autónomes, diputaciones, conceyos, les ONG, universidaes y, polo xeneral, instituciones españoles públiques o privaes— dedicáu a favorecer programes de sofitu y d’enseñanza d’español a los refuxaos ucranianos como un elementu más pa la so integración.

L’actuación enmarcase nel alcuerdu únicu adoptáu pol Conseyu d’Alministración del 31 de marzu de 2022 del Institutu Cervantes. Un alcuerdu que remarca que trabayar pola cultura y l’educación ye comprometese pola paz, los valores democráticos, l’entendimientu ente los pueblos y que, énte cualquier acontecimientu marcáu pola violencia, la respuesta tien de ser solidaria.

  Categories: