El Centru Persones ensin Llar d’Avilés convida a participar nun Belén Xigante

El Centru Persones ensin Llar d’Avilés convida a participar nun Belén Xigante
10 avientu 11:58 2020 Imprimir

Dende’l Centru Municipal d’Atención a Persones ensin Llar d’Avilés faise un llamamientu a los ciudadanos y ciudadanes para participar coles sos aportaciones de figures, pieces, elementos y demás materiales, na creación d’una Nacencia Xigante estes Navidaes. La iniciativa lleva por nome “¡Ayudar a montar el Belén!”.

L’oxetivu ye qu’a la puerta del equipamientu municipal de la cai La Estación se monte y esiba un gran Belén. Dende’l centru indiquen que “amás de representar y ser un símbolu de la Navidá, la Nacencia con toles pieces habituales que lo componen (pastores, llabradores, artesanos, homes, muyeres, neños, neñes…) representa un pueblu que trabaya, que constrúi, que nun se rinde”.

Preténdese qu’esti montaxe tea construyíu por persones usuaries del centru, trabayadores y collaboradores, a partir de cartones y plastilina. “¿Qué puedes faer tu? Traer la to figura, el to detalle fechu con plastilina, aquello qu’el to quieras representar nesta Nacencia nesti pequenu pueblu o ciudá”, añeden dende l’equipamientu.

El Belén va tar espuestu dende esti día 10 d’avientu y podrá vese dende na cai y a partir d’esi día, tou aquel que quiera puede pasar a asitiar la so figura, la so aportación. “Asina, ¡esti belén montar ente toos!”. Nunes fiestes que se van a vivir de manera distinta, onde va primar caltener distancies y nun poder compartir na mesma midida, el centru quier dar la oportunidá a la ciudadanía avilesina de faer una Navidá en xunto.

Quien quieran participar pueden llevar la so collaboración al Centru Municipal d’Atención a Persones ensin Llar d’Avilés (C/La Estación, 15), de llunes a domingu n’horariu de 10 a 12 y de 17 a 19 hores. Daes les circunstancies sanitaries, ruégase que s’allegue, como muncho, en grupos de 3 persones. Amás, dende’l Centru Municipal d’Atención a Persones ensin Llar añeden que “a tou aquel que venga dexar la so aportación echarémos-y el guante’, xuna sorpresa que guardamos…pero nun se van dir coles manos vacíes…asina de senciellu”.

  Categories: