El Centru La Semiente critica l’aplicación de la toponimia oficial en Samartín del Rei Aurelio

El Centru Social Autoxestionáu La Semiente ante l’aplicación de la toponimia oficial en Samartín del Rei Aurelio vieno acabante sacar una nota de prensa na que critica la campaña entamada hai poco por considerala vacida de conteníu, magar la vea como daqué positivo na sensibilización nel usu de La toponimia oficial del conceyu, que foi aprobada en febreru de 2008, y que recueye un total de 484 denominaciones.

El Conceyu de Samartín del Rei Aurelio ta desenvolviendo una nueva campaña pa dar a conocer y promover l’usu de la toponimia oficial del conceyu. El Consistoriu editó 2.000 chapes metáliques nes qu’apaecen recoyíos un total de 52 topónimos de pueblos como Sanamiés, La Güeria, L´Acebal, La Envernal o La Potoxa, ente otros. Tamién editaron pegatines y cartelos de la campaña col eslogan “Los nomes de llugar nun tienen preciu”. La campaña desenvuelvese col apoyu de la Rede de Normalización Lligüística nos Conceyos y cuenta col sofitu de la Conseyería de Cultura, Educación y Deporte del Principáu.

Dende la Semiente consideren esta campaña como daqué positivu na sensibilización nel usu de La toponimia oficial del conceyu, que foi aprobada en febreru de 2008, y que recueye un total de 484 denominaciones. Daqué que contribúi a la normalización y recuperación del nome de los nuesos pueblos. Pero aun así considerar vacida d’intenciones y como un meru actu de “bona publicidᔠcon ciertes dosis d’hipocresía.

Consideren que’l conceyu tien la competencia abonda non solo pa promover, sinón por que se respeten los topónimos oficiales, polo que consideramos que dende’l mesmu conceyu tendría de dir más allá. Nesi sentíu, La Semiente presentó un escritu al conceyu, por qu’amás de esta campaña de marketing y de llavadura de cara, él mesmu conceyu tamién s’aplique’l cuentu y respete el mesmu los nomes de los sos pueblos. Que tome midíes, pa que toles empreses, asociaciones, clubes deportivos, comerciantes, entidaes bancaries, etc. del conceyu usen dicha toponimia.

Asina mesmu que tomen la midíes oportunes pa que toles referencies escrites sobre los pueblos del conceyu, yá sían de prensa, publicIidá, guíes de turismu, cartografía, etc. respeten dicha toponimia oficial. Que toles publicaciones, comunicaos de prensa, documentación y demás escritos del conceyu tamién respeten y reflexen los nomes tradicionales aprobaos en 2008. Que toles instalaciones municipales tamién pasen a tener los sos rótulos col nome oficial y que tolos pueblos tamién lu vean reflexáu nes sos señales.

Que faigan amosar tamién dicha voluntá nes sos relaciones col restu d’alministraciones públiques, dende la central, a l’autonómica, al restu de conceyos. Pa que toles referencies al nuesu conceyu per parte d’éstes, respete’l nome de los nuesos pueblos. Y que ponga en marcha los mecanismos por que la señalización de tola rede de carreteres onde se faiga referencia a una de les nueses localidaes tamién la respeten.

A la fin, atalanten que nun ye cierto que “Los nomes de llugar nun tienen preciu”, en realidá si, tener el compromisu y la constancia. Consideramos que solo d’esta forma pue faese ver ante la sociedá que realmente apuesten por daqué qu’ellos mesmos aprobaron fai yá casi seis años y qu’hasta agora dio poques resultancies.