El Centru d’Arte d’Avilés acueye los meyores grabaos surrealistes de Roland Topor

El Centru d’Arte d’Avilés acueye los meyores grabaos surrealistes de Roland Topor
27 xineru 10:53 2020 Imprimir

Dende esta fin de selmana y hasta’l 1 de marzu de 18 a 21 hores podrán contemplase 51 obres nel Centru Municipal d’Arte y Esposiciones (CMAE) d’ente los meyores grabaos surrealistes de Roland Topor, unu de los artistes más personales y polivalentes del arte francés del sieglu XX.

El Centru Municipal d’Arte y Esposiciones acueye dende esta fin de selmana una esposición de grabaos de Roland Topor (Paris, 1938-1997) de quien los espertos dicen que ye’l dibuxante más plaxáu del mundu enteru. Tratase d’unu de los artistes más personales y polivalentes del arte francés de la segunda metá del sieglu XX. Faía de too, dibuxaba, escribía, tamién cine, televisión, lletrista de cantares magar collechaba calificativos de xeniu como dibuxante y grabador, campu nel qu’empecipió la so andadura profesional en publicaciones satíriques franceses de finales de los años 50 como Bizarre, Harakiri, etc.

L’amuesa que s’espón n’Avilés consta de 51 grabaos nos que la materia primo pa la imaxinación inconmensurable del autor ye la prevocación. Una “esvástica cabaretera” realizada con piernes de muyeres o xunas estremidaes que se alloñar del so cuerpu, cuerpos ensin cabeza, muyeres xigantes y homes nanos, un cazador taramiáu pol so perru son dalgunes de les imaxes recreaes pola imaxinación d’esti artista que sol títulu “L’arte fantástico de Roland Topor” pueden vese na sala del CMAE. Esta esposición, que va recalar na ciudá hasta’l 1 de marzu, pasó con gran ésitu de públicu y siguimientu de los medios, pela principales ciudaes d’España y Europa.

Nos sos grabaos, llenos d’imaxinación surrealista, ríndese homenaxe a los sos artistes predilectos, ente ellos pintores, dibuxantes y grabadores tan notables como Goya, Delacroix, Brueghel o Dalí.  L’espíritu festivu tamién s’atopa presente en tola obra de Topor polo que’l visitante qu’esfrute de los sos grabaos seguru qu’esboza más d’una sorrisa anque la tema de la litografía en cuestión sía más bien tráxicu o sangrientu. De manera xeneral, nómase’l trabayu de Roland Topor como d’obra surrealista y, en gran midida, dichu apelativu ye correctu. Les sos imaxes, como les surrealistes, remembren principios primarios del subconsciente como l’impulsu de muerte y l’impulsu de sexu que definió Freud y que los surrealistes remembraron nel so trabayu coles mires de remover la conciencia del espectador.

La esposición ta comisariada por Asier Mensuro, historiador del arte y el cine, comisariu d’esposiciones y escritor d’ensayu sobro temes rellacionaes cola cultura contemporanea. La colección pertenez a Imaxinate Producciones SLU.

  Categories: