El Centru Asturianu de Madrid anuncia los sos premios añales

El Centru Asturianu de Madrir ta acabante anunciar un añu más los sos premios, “Manzana de Oro” y “Urogallo de Bronce”. Na primer categoría resultaron ganadores l’escritor, posedor del Premiu Cervantes, Antonio Gamoneda, y l’oftalmólogu de prestixu internacional Luis Fernández-Vega. Como sociu mencionáu, Armando Fernández Suárez, númberu 30 de la entiedá, dende 1953. Los Premios Urugallo de Bronce entréguense na categoría d’artesanía, baille, tonada, corales, gaite, gastronomía, personaxe popular, llingua asturiana, defensa de la natura, deportes, festexos, especiales y especiales con mención d’honor.

Na categría de baille, el premiu foi pal Grupu de Baille Tradicional de Fitoria, que se fundó nel añu 1989 y cunta dende 2005 con una escuela de música tradicional. L’artesanu naval Luis Montoto, de Llanes, llévase’l premiu na categoría dedica al so llabor. Bibiana Sánchez ye la ganadora na categoría de tonada, y el Grupu Coral San Pedro, de Sotu’l Barcu, na de mases corales. En cuantes al premiu pol so llabor a favor de la llingua asturiana, resultó ganador esti añu, Inaciu Galán, escritor, periodista y presidente d’Iniciativa pol Asturianu.

Resultaron tamién premiaos el Grupu de Montaña y Senderismu La Chiruca de Soutu Lluiña (Cuideiru), pola defensa de la natura que faen na so actividá, la Fiesta l’Asturcón, como meyor festexu, y a Alberto Suárez, paralímpicu de Riosa, como meyor deportista. La escritora Olvido García Valdés, l’asociación Cencerru de Valdesoto y la Cofradía del Oriciu de Xixón, fueron nomaos premios especiales.

La entrega de premios va celebrase en Xixón demientres la celebración de la Feria de Muestres d’Asturies, nel mes d’agostu.

Llistáu de premiaos en toles ediciones anteriores