El Centru Asturianu de Bruseles da-y l’Horru d’Oro a Valledor con motivu del Día d’Asturies

Ente los díes 8 y 10 de setiembre, el Centru Asturianu de Bruseles remembra’l Día d’Asturies, ocasión na que se va facer entrega del galardón del centru, conocíu como l’Horru d’Oro, al alcalde de la capital belga, Freddy Thielemans, y al conseyeru de Xusticia, Francisco Javier García Valledor. Los actos de celebración de la fiesta asturiana van terminar con un conciertu a cargu del grupu Deua Dubra y del maestru gaiteru Xuacu Amieva.

L’actu d’entrega del Horru d’Oro al alcalde de Bruseles, Freddy Thielemans, y al conseyeru de Xusticia, Seguridá Pública y Rellaciones Esteriores, Francisco Javier García Valledor va tener llugar el día 8 de setiembre, festividá de la Santina, nel ayuntamientu de la capital belga. Pero los festeyos que remembren el Día d’Asturies van allargase hasta’l domingu, 10 de setiembre.

Nel programa previstu pol Centru Asturianu nun falten los tradicionales desfiles de grupos y bandes de gaites pela capital de Belxica, asina como la espicha que tolos años celebren nel MannekenPis, que pa la ocasión va volver vistise col traxe rexonal asturianu.

Tres d’una misa en Nuestra Señora Inmaculada y la procesión cola Santina peles cais de Bruseles, el centru va organizar la tradicinal puya’l ramu, a la que van seguir un torneu de bolos y un mercáu astur na Plaza d’España, que va cuntar con puestos de música, llibros, indumentaria popular, gastronomía asturiana, y muestres de xoyería y cerámica de la tierra.

Les xornaes van piesllar con un conciertu a cargu del grupu Deua Dubra y del gaiteru Xuacu Amieva.

Per otra parte, los díes 16 y 17 de setiembre, el Centru Asturianu va sumase a la Fiesta del folklore de Bruseles, que va tener llugar na Plaza Mayor de la ciudá. Encargaos de representar el folclore asturianu, el Centru Asturianu va llevar al so propiu grupu, que fadrá demostración de los bailles asturianos, xunta la Banda de Gaites Naranco, convidaos especialmente pola entidá asturiana pa la ocasión.