El CCAI acueye la mayor amuesa sobro’l fotógrafu irlandés Eamonn Doyle

El CCAI acueye la mayor amuesa sobro’l fotógrafu irlandés Eamonn Doyle
30 xunu 08:49 2020 Imprimir

La Sala 2 del Centru de Cultura Antiguu Institutu acueye hasta’l 27 de setiembre una esposición dedicada a la obra de Eamonn Doyle, na que s’esquiza’l trabayu más recién del fotógrafu irlandés (Dublín, 1969), que confirmó que va realizar un proyectu con Xixón y la so redolada como protagonistes con destín a un fotolibro, respondiendo a una invitación de la Fundación Municipal de Cultura, Educación y Universidá Popular del Conceyu de Xixón.

La esposición de Fundación MAPFRE, comisariada por Niall Sweeney, estrenose en 2019 na RHA Gallery de Dublín, antes de viaxar a Madrid onde pudo vese hasta’l pasáu mes de xineru, y ye la mayor amuesa de la obra de Doyle realizada hasta la fecha.

Al vivir nel centru de la capital irlandesa, Doyle fotografia la so contorna dende ángulos inesperaos, revelando una visión orixinal de la ciudá y los sos habitantes. Les sos series i, ON y End., conocíes tamién como la triloxía de Dublín, col so usu estratéxicu del retayu y l’encuadre, tresmiten momentos d’apaciguadura y d’enerxía frenética, de soledá y de comunidá. Al axuntar estes fotografíes, la nuesa esposición dexa al públicu esperimentar el ritmu únicu del Dublín de Doyle.

La so obra más recién, K, ye’l so trabayu más misteriosu y personal. Les fotografíes en color de gran formatu amuesen figures espectrales que camuden de forma y tán asitiaes frente a los dramáticos fondos de la mariña oeste d’Irlanda y d’Estremadura nel oeste d’España. Estes obres, y la so instalación, aluden a la tradición irlandesa del keening, un llamentu vocal polos muertos, y nacen en parte como resultáu de la perda prematura del hermanu y la madre del artista.

Coles fotografíes españoles de la serie K, Fundación MAPFRE sigue cola so misión de sofitar a destacaos fotógrafos na realización de nuevos trabayos fotográficos n’España.

  Categories: