El CAO y l’Academia coinciden en que namás la oficialidá y el compromisu del Principáu evitaríen conflictos llingüísticos

Representantes del Conceyu Abiertu pola Oficialidá y los másimos responsables de l’Academia de la Llingua ufiertaron esti xueves 27 una rueda de prensa conxunta pa convocar a la sociedá asturiana a la manifestación entamada pal prósimu 5 de payares n’Uviéu embaxo la llienda: “La oficialidá ye la solución”.

L’Academia y el CAO coincidieron en señalar que conflictos como los vivíos últimamente respective a la Tierra del Navia-Eo nun esistiríen si l’asturianu y el gallegu-asturianu tuvieren la consideranza d’idiomes oficiales de la nuestra comunidá y si el gobiernu autonómicu tomara la iniciativa en política llingüística. Según declaró a Asturnews Fernando Ornosa, portavoz del Conceyu Abiertu “si el gobiernu del Principáu tuviere una política llingüística propia y comprometida cola realidá asturiana nun diba haber intervenciones ayenes como les que sucedieron apocayá” y que “la oficialidá ye la solución, como diz el lema de la manifestación, non el problema nin lo que pueda causar problemes”. Pa Ornosa “ye’l Principáu el que tien de desarrollar la so propia política y correspuénde-yos a l’adminsitración y a los propios asturianos decidir sobre la realidá llingüística d’Asturies”.

La manifestación del prósimu día 5 de payares n’Uviéu va dir encabezada por una serie de personaxes públicos de la vida asturiana como’l ciclista Chechu Rubiera, la decana de la Facultá de Ciencies de la Educación Aquilina Fueyo, la decana de Filoloxía Ana Cano, el caderalgu Javier Fernández Conde, les artistes Maite Centol y María Xesús Rodrígues, los actores José Antonio Lobato y Maxi Rodríguez; los escritores Luis Arias Argüelles y Marta Mori, l’ex presidente del Real Uviéu Manuel Lafuente; les presentadores de televisión Rosa Viondi y Sonia Avellaneda; el gaiteru Xuacu Amieva, ente otros. A la fin de la manifestación na Plaza la Catedral va haber un festival de música coles actuaciones del Cuartetu Torner, Mari Luz Cristobal Caunedo, Annabel Santiago y Skama na Rede.

Como adelantru de la movilización el CAO va entamar esti domingu a les 12 del meudía entrambos amagüestos nel Rastru de Xixón y delantre’l Teatru Campoamor n’Uviéu pa difundir la convocatoria y les sos propuestes. Hasta agora tienen confirmao l’apoyu a la manifestación toles organizaciones sindicales presentes n’Asturies, Izquierda Xunida, Bloque por Asturies, Izquierda Asturiana, PAS y URAS.