El CAO denuncia la falta de voluntá de diálogu del PSOE énte les demandes d’oficialidá

El Conceyu Abiertu pola Oficialidá (CAO) denuncia la postura ríxida del grupu socialista na Xunta Xeneral a aceptar cualaquier diálogu cola plataforma cívica. A pocos díes de la convocatoria d’una manifestación n’Uviéu embaxo’l lema “La oficialidá ye la solución” el CAO señala al PSOE como l’únicu grupu presente na cámara asturiana que se niega a falar sobre les reivindicaciones de la plataforma en materia de derechos llingüísticos.

Fontes del CAO manifestaron a Asturnews la so decepción énte la postura de los socialistes, que se negaron mesmo aceptar el documentu reivindicativu elaboráu pol colectivu unitariu. De los tres grupos con representación parlamentaria, tanto el popular como’l d’Izquierda Xunida-Bloque por Asturies caltienen abiertes meses de diálogu col CAO, mientres el PSOE nin siquier llegó a baraxar esta posibilidá.

Nos últimos meses el Conceyu Abiertu pola Oficialidá aconceyó col PP y con IX-BA. De los resultaos d’eses reuniones la plataforma sacó en conclusión que los populares ufierten una actitú receptiva a siguir falando inda refuguen de momento asumir les reivindicaciones del Conceyu sobre la reconocencia d’oficialidá. Izquierda Xunida-Bloque, pel so llau, en consecuencia cola so participación nel CAO y col so propiu programa políticu, asume como propies les demandes sobre derechos llingüísticos. PP ya IX-BA comprometiéronse a siguir calteniendo abiertos los calces de diálogu cola plataforma.

El Conceyu Abiertu pola Oficialidá fexo públicu’l so malagustu cola actitú de cerazón del PSOE mientres se vuelca en difundir la convocatoria del prósimu 5 de payares n’Uviéu, qu’espera masiva. Asina el CAO entamó entrambos magüestos esti domingu 30 en Xixón y n’Uviéu col fin de facer visible’l llamáu a la manifestación del sábadu y nos prósimos díes va intensificar los llabores de difusión de la convocatoria.