Portada Conceyos El cancioneru de los refuxaos na XIV Selmana Cultural Aula Popular

El cancioneru de los refuxaos na XIV Selmana Cultural Aula Popular

by redacción asturnews

El Cancioneru de los refuxaos españoles nos campos de concentración franceses ente 1939-1942, un espectáculu nel que Luisa y Cucu Pérez comparten la so música, la so hestoria y les sos alcordances col públicu, al que van tresportar a un viaxe emocionante y necesario, ye la cita d’esti miércoles caberu de xineru nel Teatru Xovellanos de Xixón.

En 1939 más de mediu millón d’españoles pasaron la frontera escontra Francia fuxendo de la guerra y de les represalies. Llegaron cansaos, a cuerpu, con fríu, abasnando les sos poques pertenencies y nun atoparon el recibimientu qu’esperaben: Francia los confinó en campos de refuxaos o de concentración, nos que se sintieron abandonaos por toos, trataos como ganáu y escaecíos del mundu.

Luisa y Cucu Pérez remembren el camín que realizó la so familia pelos campos de concentración franceses y fainlo al traviés de los cantares que-yos enseñó so madre, que naquel momentu nun yera más qu’una neña refuxada. Amás inclúin los cantares que recoyeron a los supervivientes d’aquellos campos de Francia y que publicaron apocayá nel llibru-discu tituláu “Allez, allez..!”

Miércoles 29 de xineru, 20.30h – TEATRO XOVELLANOS
Entama: Aula Popular J.L. García Rúa
Cantares como “Somos los murnios abelugaos”, “Bourg Madame”, “A México, vida mio” o la escrita pol so güelu nel campu de Rivesaltes “Cuando a Francia yo a cuerpu dirixí”, que reflexen non yá el dolor, sinón tamién l’humor col qu’enfrentaron la so desgracia pa poder sobrevivir. Amás, avérennos de primera mano a la hestoria de la so familia con semeyes y anécdotes, como les referíes al entierru del poeta Antonio Machado, en Collioure, o a los oxetos de la dómina que los acompañen nel escenariu.

Tamién te podria gustar