El campus infantil y xuvenil de branu de la Factoría Cultural ufierta 168 places

La conceyalía de Cultura d’Avilés llanza una nueva edición del campus infantil y xuvenil “Branu con Arte”, al traviés de la Factoría Cultural, col que 168 neñes, neños y mocedá van poder esfrutar d’unes vacaciones distintes, una inmersión na creación artística, de forma didáctica y risondera, al empar que se facilita a les families la conciliación cola vida llaboral.

El campus ufierta 5 cursos distintos, cuatro nel ámbitu de les artes plástiques y gráfiques, y unu más nes artes escéniques, con un propósitu: favorecer la promoción del talentu artístico y creativo d’una forma activa, con talleres impartíos por profesionales de reconocíu prestíu, con un total de 168 places.

Destinaos a neñes, neños y adolescentes d’ente 5 y 16 años (la edá mínima y máxima tendrá de tar cumplida na fecha d’entamu de l’actividá), de llunes a vienres en dos quincenes, del 4 al 15 y del 18 al 29 de xunetu. Con un total de 30 hores lectives en cada cursu, 15 a la selmana, a desenvolver n’horariu mañaneru, de 10.00 a 13.00 hores.

Los d’artes plástiques y gráfiques van ufiertar 12 places cada unu por quincena, impartiéndose les disciplines de cerámica, pintura, grabáu y stop-motion, en función del cursu. Nel casu del d’artes escéniques, van ser 32 por quincena, nos ámbitos del cantar, del baille y de les técniques circenses. Caltiense d’esta forma’l compromisu del Conceyu d’Avilés d’ufiertar a les families con menores al so cargu actividaes que faciliten la conciliación de la so vida personal, llaboral y familiar.