El campus “Branu con Arte” torna a la Factoría Cultural d’Avilés con talleres creativos

El campus “Branu con Arte” torna a la Factoría Cultural d’Avilés con talleres creativos
26 xunu 08:51 2019 Imprimir

El campus “Branu con Arte” torna a la Factoría Cultural con talleres creativos pa neñes y neños d’ente 5 y 16 años que van poder esfrutar d’actividaes de cerámica, dibuxu y pintura, lo mesmo que de hip hop y commercial dancie. El preciu de la inscripción ye de 40 euros, y la duración de cada taller va ser d’una quincena, en trés veces nos meses de xunetu y agostu.

Un añu más, la Factoría Cultural enllena la temporada braniza cola so propuesta creativa destinada a les neñes y los neños d’Avilés, d’ente 5 y 16 años. “Branu con Arte” ufierta, nes mañanes de xunetu y agostu, talleres de cerámica, de dibuxu y pintura, y de baille nos estilos hip hop y commercial. Va Ser en trés veces, partíos en quincenes, con un preciu d’inscripción de 40 euros. La inscripción podrá realizase a partir d’esti llunes, 17 de xunu.

El campus qu’ufierta’l centru cultural del Carbayedo busca aguiyar la conocencia, mientres se desenvuelven les capacidaes de cada neña y neñu, nes árees a trabayar. Diversión, entretenimientu y educación, al empar que se trabayen vezos de convivencia, según valores de respetu entres los compañeros y tamién escontra’l mediu ambiente.

Estremóse’l trabayu en trés quincenes, y 30 hores, del 1 al 12 de xunetu, del 15 al 26 de xunetu, y del 29 de xunetu al 9 d’agostu. Les clases van tener una duración d’una hora, y van desenvolvese de 10 a 13 hores, de llunes a vienres. Y cada alumnos va poder apuntase a un máximu de dos quincenes.

Cada grupu va ser de 12 alumnos a lo más, y el material que se va utilizar incluyese nel preciu d’inscripción. Ye necesariu llevar ropa cómodo, como mandilones o inclusive ropa vieyo. Les neñes y los neños participantes van esfrutar l’aprendizaxe esperimental.

Los conteníos van ser los siguientes:

Taller de dibuxu y pintura. L’alumnáu va aprender a identificar y apoderar el color, según la manipulación de distintes pintures, el so manexu y posibilidaes. Con técniques de iniciación a la reproducción de colores (en formes y testures), a la figura humana y d’oxetos y modelos al natural, y en composiciones non figuratives. Coles mesmes, van adquirir vezos d’observación, de la redolada y del fechu artísticu. Y van poder espresase con distintos técniques y estampaos, mientres desenvuelven mañes manipulativas (cortar, resgar…), y en dibuxu con carboncillo, rotulador o pintures. Inclusive van fabricar los sos propios pigmentos partiendo de les materies primes.
Taller de cerámica. Van Afayar les técniques a utilizar sobro material cerámico, según en folla, y les ferramientes necesaries pa la so manipulación. Y van realizar les sos propies pieces, con pintura, acabáu y cocción.
Taller de hip hop y commercial. Neños y neñes van aprender pasos básicos y coreografíes de dambes especialidaes. Van Potenciar mañes físiques, como fuerza, flexibilidá, equilibriu, coordinación y espresión corporal; mentales, como concentración, disciplina, creatividá ya imaxinación, y sociales, compañerismu y trabayu n’equipu.

Inscripciones

Les inscripciones, a un preciu de 40 euros, pueden realizase a partir d’esti llunes, 17 de xunu, per teléfonu, nos númberos 985 548 617 y 985 129 375. Tamién directamente na Factoría Cultural, na avenida de Portugal, 13. Los horarios pa faelo son de 9 a 14.30  y de 16.30 a 21 hores, nel mes de xunu, y de 9 a 14.30 hores en xunetu, hasta completar les places ufiertaes.

En casu de que queden places vacantes, les inscripciones podrán realizase hasta’l día anterior al empiezu de les distintes actividaes.

  Categories: