El Calatrava acueye’l campeonatu d’axedrez internacional ente escueles d’Uviéu y Hong Kong

El Calatrava acueye’l campeonatu d’axedrez internacional ente escueles d’Uviéu y Hong Kong
04 xineru 10:01 2019 Imprimir

Esti vienres 4 de xineru, a partir de les 10 de la mañana, nel Calatrava, xugadores de la Escuela de Ajedrez Ciudad d’Uviéu van enfrentase, de manera on line, a xugadores d’escueles de Hong Kong.

El conceyal de deportes, Fernando Villacampa, y el Director Técnicu de la Escuela de Ajedrez Ciudad d’Uviéu, Alberto Llaneza, presentaron esti miéroles  la competición d’axedrez internacional que va tener llugar esti vienres nel Calatrava.

L’eventu celebraráse’l vienres 4 de xineru, na Sala de Cristal del Palaciu d’Esposiciones y Congresos Calatrava, a partir de les 10 de la mañana. Los competidores locales, pertenecientes a la Escuela de Ajedrez Ciudad d’Uviéu, provienen de los clubes d’Axedrez del Naranco y al Real Uviéu, y van enfrentase, de manera on line, a xugadores d’escueles d’axedrez de Hong Kong, na modalidá d’axedrez internacional. Les partíes van ser de 25 minutos, y van xugase 8 tableros contra 8, turnándose nes partíes les pieces de colores blanques y negres. Tolos xugadores pertenecen a la categoría sub-16, por tantu les sos edaes van dir dende los 7 a los 16 años. Les partíes van xugase al traviés de la plataforma chess24, na que collaboren grandes maestros d’esti deporte como Magnus Carlsen.

L’axedrez ye un deporte en crecedera que llevanta cada vegada más interés; la Escuela de Ajedrez Ciudad d’Uviéu cunta con 150 neños federaos y más de 500 alumnos p’aprender a xugar la modalidá d’axedrez internacional.

  Categories: