El Brexit va trayer aumentu de precios nos discos y permisos de trabayu

El Brexit va trayer aumentu de precios nos discos y permisos de trabayu
04 xunetu 09:30 2016 Imprimir

L’aumentu de precios nos discos y el pidimientu de permisos de trabayu p’artistes británicos que vengan a España de xira son dalgunes de les posibles consecuencies del Brexit na industria musical, que va encarar retos en distintos aspeutos llegales, burocráticos y económicos tres la decisión de Reinu Uníu de salir de la UE.

Un informe ellaboráu por Ticketbis sobre la nueva situación del sector destaca cómo por casu los músicos británicos podríen precisar permisu de trabayu p’actuar nun país européu o la posible medría del preciu de los discos y el merchandising qu’agora tán exentos de pagar IVA nin derechos d’aduana ente países de la UE. Amás, resalta que tamién podría encarecese’l preciu de los vuelos (lo que podría influyir nes xires). “La Unión Europea apurre un marcu llegal sólidu que beneficia a la industria musical, ordena y simplifica aspeutos llegales como los derechos d’autor”, asegura l’informe.

Pa Ticketbis, artistes como Adele o Coldplay “probablemente nun noten la diferencia yá que cunten con recursos abondos p’afaese al nuevu escenariu”. “Sicasí, grupos que tán empezando sí podríen atopase con mayores dificultaes a la de planiar xires porque namái van poder actuar si un promotor fai-yos una ufierta pa llevar a cabu’l conciertu”, recordaron. Otra de les realidaes que reflexa l’analís ye que los principales cambeos que podríen averase afectaríen, en mayor midida, a los ciudadanos británicos una y bones ellos siempres fueron componentes “especiales” de la UE.

Asina, apunta qu’a la de trabayar nel Reinu Uníu los artistes europeos nun teníen les mesmes condiciones qu’ufierten otros países, yá que, a día de güei, sí ye necesariu un permisu de trabayu pa dar un conciertu en Reinu Uníu.

Reinu Uníu ta considerada una potencia dientro del panorama musical y n’España hai numberosos siguidores de bandes britániques. Ello ye que España ye’l sestu país que más música británica mercó nel añu 2015 (representando un 12% del total de les vientes), según datos de BPI.

  Categories: