El Botánicu presenta’l so Catálogu revisáu d’hongos, con una charra sobro l’estudiu y los sos afayos

El Botánicu presenta’l so Catálogu revisáu d’hongos, con una charra sobro l’estudiu y los sos afayos
13 mayu 10:22 2019 Imprimir

El Botánicu presentó’l so Catálogu revisáu d’hongos, esta fin de selmana pasada, con una charra sobro l’estudiu xurdíu de les continues herborizaciones que, mientres casi trés años (2016 a 2019), llevarase a cabu na instalación.

Trés son los y les autores d’esti trabayu (D. Enrique Rubio, Dña. Marta González, D. Jorge Díaz), recoyíu como númberu 15 de la serie Documentos del Botánicu y tituláu Catalogo revisáu de los macromicetos del Xardín Botánicu Atlánticu (2º parte). Un trabayu que foi frutu de les continues herborizaciones que, mientres casi trés años (2016 a 2019), llevarase a cabu a lo llargo de tol añu ya independientemente de la estación, yá que esisten hongos que fructifican en plenu branu y otros que lo faen mientres l’iviernu.

Dalgunos destaquen pola so rareza,  ente qu’otros, muncho más comunes, nun fueren detectaos, hasta la fecha. Toos ellos fueron incorporaos al catálogu fúnxicu del Xardín Botánicu. Nesta nueva entrega incorporáronse 169 nuevos taxones (40 d’ellos son nuevos rexistros pal catálogu Asturianu d’hongos), que sumaos a los 762 identificaos en trabayos anteriores, faen que’l censu total actual de los macromicetos nel Xardín alcen la cifra de 931 taxones.

L’apertura en 2018 d’una nueva colección temática nel Xardín Botánicu, el Bioma Boreal Americanu, facilitó descomanadamente la detección de nueves especies hasta’l momentu ensin censar, tantu poles peculiaridaes intrínseques de les especies vexetales presentes nesa zona, como pola remoción y aireación de los suelos que les obres d’acondicionamientu en dichu espaciu aniciaron. Con toos estos afayos, el catálogu de macromicetos d’Asturies (RUBIO & al., 2006, 2016b) algama na actualidá xuna cifra de más de 4.000 taxones fúngicos. L’aplicación de les modernes técniques de la bioloxía molecular a la yá de por sí bien inestable taxonomía fúngica fai que los cambeos nos nome de los taxones sían casi constantes, tantu a nivel xenéricu como específicu.

Tres la presentación, D. Enrique Rubio Domínguez, médicu aficionáu a la micoloxía, collaborador nel estudiu de los hongos del Botánicu y coautor del llibru, foi l’encargáu d’impartir la charra “Hongos censaos nel Xardín Botánicu. Metodoloxía emplegada y resultancies”. Y n ella va esplicar, de forma senciella y amena, los tipos d’hongos rexistraos nel estudiu y los hábitats prospectados, faciendo especial énfasis naquellos hongos que viven en situaciones estremes, alloñaos del suelu.

 

  Categories: