Portada Conceyos El Botánicu convida a una “Espedición Humboldt” na so Selmana de la Ciencia

El Botánicu convida a una “Espedición Humboldt” na so Selmana de la Ciencia

by redacción asturnews

El Xardín Botánicu dedica la so Selmana de la Ciencia al célebre naturalista alemán Alexander Von Humboldt, con motivu del 250 Aniversariu de la so nacencia, y failo con xornaes de puertes abiertes y un programa d’actividaes tamién gratuites.

Anque conocíu como un gran esplorador y naturalista, Humboldt foi muncho más qu’eso. Foi un investigador en numberoses disciplines científiques como la física, la climatoloxía, la oceanografía, l’astronomía, la xeoloxía, la botánica, o la vulcanoloxía, llegando a estender el so nivel de conocencia a otres árees del arte y les humanidaes. Foi una figura indiscutible nel desenvolvimientu de la xeografía moderna polo xeneral, y de la geobotánica en particular, según na visión ecolóxica de la naturaleza, como una rede de vida conectada. Les sos idees fueron determinantes na postulación de teoríes posteriores como la evolución, la tectónica de plaques o la dinámica de los océanos. La so forma de pensar y de trabayar punxo de manifiestu’l calter colaborativo del trabayu científicu y l’importancia de tresmitir esta conocencia a tola sociedá. El so legáu para la ciencia, dos sieglos dempués, ye más actual que nunca.

La Espedición Humboldt pol Botánicu, pretende averar el trabayu de Humboldt a la ciudadanía y esplicar la so relevancia histórica. Vamos siguir los pasos de Humboldt nes colecciones vexetales y museos del Xardín, n’una esposición sobro los sos estudios y espediciones y nuna pequena recreación de lo que sería’l so llaboratoriu na selva. Vamos Conectar los sos estudios y midíes cola más avanzada tecnoloxía pa percanciar datos de la naturaleza a escala global. De la mano d’espertos vamos faer una repasada a la so figura, pero tamién vamos afayar tolo que tienen de mancomún un naturalista del sieglu XIX con un investigador botánicu actual.

PROGRAMA D’ACTIVIDAES (descarga equí en pdf)

Tamién te podria gustar