El borrador de la orde de selectividá nun preve cambeos nes prebes

El borrador de la orde de selectividá nun preve cambeos nes prebes
16 xineru 09:43 2020 Imprimir

El Ministeriu d’Educación nun paez que tenga cuenta de introducir cambeos nes prebes de selectividá que se van celebrar el próximu mes de xunu. El borrador de la orde ministerial que va regular les característiques, el diseñu y el conteníu de la Evaluación de Bachilleratu para l’Accesu a la Universidá (EBAU) en tol país describe unes pruebes idéntiques a les realizaes el cursu pasáu, cola única actualización lóxica, obligada pol calendariu de cada exerciciu, de les feches llende para la finalización de los exames y la publicación de les notes.

El documentu, que ta en periodu d’audiencia ya información pública, entá tien que recibir los allegamientos de los responsables educativos autonómicos, al traviés de la Conferencia Sectorial d’Educación, y de los axentes de la comunidá educativa, al traviés del Conseyu Escolar del Estáu, antes de ser aprobáu definitivamente, pero n’años anteriores nun hubo diferencies ente’l proyectu d’orde ellaborada pol ministeriu y la finalmente publicada nel BOE.

El ministeriu empecipió los trámites pa l’aprobación de la orde -que nun contien cambeos nes pruebes- magar que en ochobre anunció la puesta en marcha d’un comité técnicu, con participación de responsables d’Educación y Universidaes, de les autonomíes, de rectores, espertos y estudiantes, pa revisar el funcionamientu del actual modelu de la EBAU.

L’oxetu del grupu de trabayu yera comprobar si esiste, como denunciaron nos últimos años alumnos y centros de delles comunidaes, un desigual grau de dificultá nos exames entamaos poles distintes autonomíes pa, según les conclusiones llograes, tomar midíes pa correxir les disfunciones y garantizar la mayor equidad posible a tolos alumnos qu’aspiren a ingresar na universidá, esaminar de la selectividá onde s’esaminen.

El ministeriu, consultáu sobre’l particular, nun facilitó información sobro l’actual estáu de los trabayos del comité técnicu de la EBAU nin esclarió si ellaboró una orde ensin cambeos nes pruebes porque yá decidió que los cambeos que pudieren proponer los espertos nun s’apliquen hasta los exames de próximos cursos.

Tiempos y conteníos

L’actual proyectu d’orde ministerial indica que toles autonomíes tienen que tener remataos los exames de la EBAU el próximu 18 de xunu como mui tarde, pa poder publicar les notes antes del 26 de xunu, y que les pruebes de la convocatoria estraordinaria van tener fecha llende de finalización el 10 de xunetu -si les autonomíes opten por faer repescar al empiezu de les vacaciones- o’l 16 de setiembre, en casu contrariu.

L’exame de cada materia va durar 90 minutos, siquier el 70% de los sos conteníos tendrán de ser de los marcaos pol ministeriu y hasta el 30% de los escoyíos poles autonomíes, cada prueba va tener ente 2 y 15 entrugues de cualquier formatu, y les pruebes van durar un máximu de cuatro díes (cinco n’autonomíes con llingua cooficial).

La nota de la EBAU va llograr de la media aritmética de los cuatro exames obligaos: les trés materies troncales xenerales (Hestoria d’España, Llingua Española y Lliteratura y primer idioma estranxeru) -que son cuatro nes autonomíes con llingua cooficial- y la troncal de modalidá (Llatín, Matemátiques o Arte, según l’itinerariu escoyíu), con una puntuación de 0 a 10. El mínimu p’aprobar ye un 4. La nota xeneral d’accesu a la universidá va ser la media ponderada de la llograda na EBAU, que va tener un pesu del 40%, y de la de Bachilleratu, con valor del 60%, y siempres tien de ser siquier d’un 5.

Pa xubir nota y poder entrar nel tramu de 10 a 14 puntos, el borrador dexa a los alumnos que lu deseyen esaminase de dos o más materies d’opción del bloque de les asignatures troncales de segundu, que la so calificación sirvirá-yos p’ameyorar -nunca empiorar- la nota cola que compiten por una plaza nel grau de la so elección.

Les universidaes van poder tener en cuenta nos sos procedimientos d’almisión les notes que los alumnos que lu deseyen saquen al esaminase d’una segunda llingua estranxera y tamién van poder usar pa la meyora de la nota d’accesu la calificación llograda pol estudiante nel exame de la materia troncal xeneral de modalidá, realizáu na parte obligada de la prueba.

Los estudiantes tamién tienen la opción de presentase en socesives convocatories -tanto na estraordinaria de xunetu o setiembre como nes de cursos posteriores- p’ameyorar la calificación llograda en cualesquier de les pruebes, col matiz y la tranquilidá de que solo se tomará en considerancia la nota resultante de la nueva participación si ye cimera a l’anterior.

El documentu afita los tiempos de validez de les pruebes. La superación de la selectividá ordinaria y la nota van tener validez indefinida p’aportar a la universidá. Sicasí, la orde matiza que les calificaciones llograes nes pruebes voluntaries p’ameyorar la nota de la EBAU solo van sirvir nos dos cursos siguientes a llograles.

  Categories: