El Antroxu d’Avilés recrea la Grecia clásica hasta’l 13 de febreru

El Antroxu d’Avilés  va quedase hasta’l 13 de febreru sol lema “Un Antroxu bien greciosu”, y con un ampliu programa d’actividaes. El martes d’antroxu, fiesta local al coincidir anguaño San Agustín en domingu va ser el día central.

Tres el miércoles sardineru, el xueves de comadres, la coronación de les reines del Goxu y de la Faba, el XXIX Descensu de Galiana, el domingu antroxeru, el llunes de Murgues y Fanfarries;el Desfile del martes d’antroxu; l’Entierru de la Sardina; y de llueñe ….el Sábadu de Piñata. Anguaño’l martes 9 de febreru ye fiesta local al coincidir la fiesta local de branu (San Agustin, 28 d’agostu) en domingu.

Les Reines del Goxu y la Faba d’esta edición son les integrantes de “Efectu M” (la so candidatura foi la más votada). La so propuesta resumese na siguiente declaración d’intenciones: “Agora que tan de moda ta Grecia, queremos dar una visión antroxera de too lo que ta pasando. Con nós de Reines del Antroxu 2016, ¡¡Ambura Troya!!”. Tomen “posesion”  de la so “autoridá carnavalera” nel actu públicu de Coronación ( vienres 5 de febreru , a les 20 hores na Plaza d’España)..

El vienres ye tamién un día señaláu pa los más pequenos, col Desfile d’Escolinos Antroxaos (17:30 hores, dende la plaza d’España) y la posterior fiesta nel pabellón del Complexu Deportivu Avilés (El Quirinal), que cunta col espectáculu de “Los RocKids” como principal reclamu.

El Descensu de Galiana va ser la otra cita ineludible del Antroxu d’Avilés con 20 artiluxos y cerca de trescientos navegantes. Rematáu’l plazu pa la presentación de proyectos ya inscripciones nel XXIX Descensu de Galiana, un total de 20 artiluxos participen nel Descensu de la cai de Galiana (sábadu 6 de febreru a partir de les 18.30 hores). La mayoría de los artefactos fueron construyíos poles distintes peñes nos Talleres del Descensu (antiguu taller de Repuestos Amáu, na avenida Conde de Guadalhorce, 55 n’Avilés).

Cabo destacar tamién na programacion d’Antroxu l’actuación de la banda de folk-rock Mägo de Oz, el llunes, 8 de febreru, na plaza d’España, a partir de les 23:30 hores.