El 94,2% de la mocedá asturiano pide la oficialidá: la mesma protección pal asturianu que pales demás llingües

El 94,2% de la mocedá asturiano pide la oficialidá: la mesma protección pal asturianu que pales demás llingües
23 ochobre 14:25 2018 Imprimir

Un estudiu sobre la mocedá y la llingu asturiana, presentáu esti martes na see de l’ALLA destaca que’l 67,5% de los jóvenes considera l’asturianu una llingua útil tanto pal ámbiuo familiar como pal social y el 94,2% pide la oficialidá, esto ye, la mesma proteición que tienen les demás llingües autonómiques.

Esti martes, 23 d’ochobre, a les 12:00 hores, nel llar de l’Academia de la Llingua Asturiana presentábase l’Avance de Resultados de la investigación “LOS JÓVENES Y LA LENGUA ASTURIANA”, entamáu pol Conseyu de la Mocedá del Principáu d’Asturies en collaboración cola Academia.

L’estudiu sociolóxicu, dirixíu pola profesora del Departamentu de Ciencies de la Educación de la Universidá d’Uviéu, Isabel Hevia Artime, estudia les opiniones y actitúes de la mocedá d’Asturies pa col asturianu y les sos posiblidaes de futuru. Nel actu interveníen Álvaro Granda Cañedo, presidente del Conceyu de la Mocedá del Principáu d’Asturies; Xosé Antón González Riaño, presidente de l’Academia de la Llingua Asturiana ya Isabel Hevia Artime, autora del estudiu.

El presente estudio llevose a cabu de manera conxunta ente’l Conseyu de la Mocedá del Principáu d’Asturies y l’Academia de la Llingua Asturiana al envís de realizar un primer aproximamientu a les opiniones y actitúes llingüístiques de la mocedá asturiana sobro la llingua propia d’Asturies1. Centrar el focu d’estudiu nesti colectivu (mozos de 16 a 29 años) ye especialmente interesante, y la vegada bien necesariu, cuidando que, dende’l puntu de vista de cualquier sociedá, la mocedá representa’l futuru y tien xuna potencial influencia nel cambéu social, convirtiéndose n’unu de los principales focos d’interés de los estudios sociales.

Amás, la mocedá adquier una entidá sociolóxica propia y distintiva que, dende’l puntu de vista de los estudios sociollingüísticos, fai que sía’l grupu social más aparente pa impulsar la revitalización llingüística.

Per otru llau, en contestos de llingües minoritaries, como ye’l casu del asturianu, l’estudiu de les actitúes ente estos mozos resulta entá más relevante cuidando que l’actitú al respective de una llingua trai ineludiblemente una valoración sobro les posibilidaes de la so supervivencia (Fasold, 1984)2. Si tenemos en cuenta, tal como señalen los espertos nesta temática, que les actitúes suponen característiques personales relativamente estables a lo llargo del tiempu y que se rellacionen col comportamientu de les persones, el fechu de que la mocedá manifieste actitúes positives o negatives frente a la llingua asturiana y los sos falantes supon un bon indicador de les perspectives de caltenimientu de la mesma.

Nesta meyora de resultancies vamos atopar información sobro patrones d’usu llingüísticu de la mocedá y, sobremanera, sobro  les sos actitúes en relación cola presencia de la llingua asturiana en distintos ámbitos de la vida pública. Na midida de lo posible, amuésase xuna visión comparativa colos datos apurríos pol III Estudiu Sociollingüísticu n’Asturies

Descargar

  Categories: